Astanada Qytai azamatymen tanysýǵa daiyn qyzdar men áielder tobyn jinastyryp jatyr. Osyndai mazmundaǵy habarlama Facebook áleýmettik jelisindegi "Doska obiavlenii Almaty, Astana" pabliginde jariialanǵan, - dep habarlaidy "Ult aqparat" kaz.tengrinews.kz portalyna silteme jasap. Beijińnen kelgen dókei jigitter toby qazaqstandyq qyzdar men shynaiy qarym-qatynas qurý úshin kele jatqany aitylady.
"18-40 jas aralyǵyndaǵy basy bos qyzdar! Beijiń turǵyny, boidaq er jigitke turmysqa shyqqyńyz kele me? Bizge habarlasyńyz. Beijińniń dókei jigitter toby Astanaǵa otbasyn qurý úshin kele jatyr. Arnaiy birneshe sharalar daiyndalyp jatyr. Er adamdar baqýatty ómir súredi, eýropalyq bilimi bar, aǵylshyn, orys tilderin jetik meńgergen", - delingen habarlandyrýda.
Osy sharaǵa qatysý úshin 15-25 myń aralyǵynda tóleý qajet ekeni de aitylady. Sonymen qatar, qalyńdyq izdeý birneshe baiqaýdan turady. Qytai azamattarynyń Astanaǵa kelýi aqpan aiynyń ekinshi jartysyna josparlanǵan.
Osy habarlandyrý áleýmettik jelilerde daýǵa qaldy. Jeli qoldanýshylary ózderiniń narazylyǵyn bildirip, pikir qaldyrýda.
"Qytaida qyz joq degenge senbeimin. Olarǵa basqa elge baryp, qalyńdyq tańdaýdyń ne qajeti bar. Qytailyqtar qai elde tursa da, óz dástúrin qatty qurmetteidi. Olarda aralas otbasyn qurǵandar óte az. Al bular ne demalý úshin kele jatqan bai adamdar, ne sol elden qashyp júrgender", - dep jazady Jeli qoldanýshylarynyń biri.
"Ózimizdiń jigitter az ba? Sandyraq. Bizge sheteldikter kerek emes, ózimizdiń jigitter jetedi. Sonymen qatar, bizdiń dástúrimiz ben saltymyz bólek", - dep jazǵan taǵy bir adam.
Osyǵan deiin mamandar Qazaqstanda jalǵyz basty áielderdiń kóptigin aitqan. Sol sebepti neke qiiý agenttikteri jalǵyz basty qyzdarǵa Eýropalyq sur boidaqtarǵa turmysqa shyǵýdy usynatyn kórinedi.
