A. Baraev atyndaǵy astyq sharýashylyǵy ǵylymi-óndiristik ortalyǵynyń mamandary reseilik áriptesterimen birlesip bidai jáne ózge de aýyl sharýashylyǵy dándi-daqyldarynyń jańa surpyn ázirleý ústinde. Bul týraly atalǵan ortalyqtyń direktory mindetin atqarýshy Baqyt Erbolatov málim etti, dep habarlaidy QazAqparat.
«Bizdegi bidaidyń jańa suryptary buzylmaidy jáne uzaq saqtalady. Sondyqtan da aýyl sharýashylyǵy salasynda keńinen tanymal. Búginde bidaidyń «Shortandy- 20/12», «Shortandy - 95 jaqsartylǵan», «Astana» atty jańa suryptary elimiz boiynsha 3 mln-nan astam ga jerge egildi. Jáne bul bidai suryptaryna suranys joǵary. Degenmen de biz bul jetistikpen toqtamai, bidaidyń basqa suryptaryn ázirleýdemiz. Atap aitqanda, «Asyl sapa», «Taimas» ataýly bidaidyń jańa túri búginniń ózinde aýyl sharýashylyǵynda úlken suranysqa ie», - dedi B. Erbolatov.
Onyń aitýynsha, ortalyq mamandary tek bidai ǵana emes, sondai-aq mal azyǵy úshin uzaqmerzimdi shópterdiń de jańa suryptaryn ázirleýdi qolǵa alýda.
«Aitar bolsam, sýdandyq «Nika» ataýly shópti novosibirlik ǵalymdarmen birlesip ázirledik. Búginde ol synaq merziminen ótýde. Odan bólek, jarmanyń da jańa suryptary bar. Qazirgi ýaqytta bizdiń mamandar 140-tan astam aýyl sharýashylyǵy dándi-daqyldarynyń jańa surpyn daiyndap shyqty. Onyń 60 paiyzyn bidai túrleri quraidy. Bolashaqta óz ónimderimizdi syrtqa esporttaýdy da josparlaýdamyz. Búginde bul baǵytta reseilik áriptesterimizben birlesken kólemdi jumystar atqarylýda», - dedi ol.
