Foto: depositphotos.com
Elimizde tirkelgen 400-den astam bloger 2023 jyly 200 mln teńgeden astam salyq tólegen. Bul týraly Premer-ministrdiń orynbasary – qarjy ministri Erulan Jamaýbaev málimdedi, - dep habarlaidy Sputnik Qazaqstan.
Jamaýbaev mobildi aýdarymdarǵa qatysty suraqtarǵa jaýap berdi.
"Keibir media resýrstar men blogerlerdiń arasynda donat retinde halyqtan aqsha jinap, jumys istep jatqandary bar. Olar ne isteýi kerek? Bul táýelsiz jýrnalistikaǵa tusaý salmai ma?", - degen saýal qoiyldy ministrge.
Onyń aitýynsha, táýelsiz jýrnalistikaǵa eshqandai tusaý bolmaidy.
"Qazirdiń ózinde bizde 400-den asa bloger tirkelgen. 2023 jyly olar 200 million teńgeden asa salyq tóledi. Eger de olardyń qyzmeti kásipkerlikpen bailanysty bolsa, árine, olar salyq tóleýge tiis. Oǵan arnaiy salyq rejimderi bar – 1 paiyzdan 4 paiyzǵa deiin. Eger de olardyń jumysy tikelei kásipkerlikpen bailanysty bolmasa, olarǵa eshqandai suraq týyndamaidy jáne salyq tólenbeidi", - dedi Jamaýbaev.
Sonymen qatar, ministrdiń aitýynsha, aýyr syrqattanǵan týystarynyń emine aqsha jinaityn azamattar da salyq tóleýge mindettelmeidi.
"Ondai qarajat kásipkerlikke jatpaidy. Sondyqtan biz ondai aýdarymdardy teksermeimiz jáne odan salyq alynbaidy. Eger de ol kriteriiler boiynsha salyq organdarynyń nazaryna ilinse, biz tiisti aqparatty suratamyz. Salyq organdary kóz jetkizgennen keiin, árine, bul faktiler boiynsha eshqandai suraq týyndamaidy", - dep atap ótti vitse-premer.
