«Qazaqfilmniń» úsh filmi «Altyn globýs» júldesine úmitkerler tizimine kirdi, dep habarlaidy QazAqparat.
«Altyn globýs» júldesin tabystaityn Gollivýdtyń shetel baspasózi qaýymdastyǵy (HFPA) «Sheteldiń úzdik filmi» nominatsiiasyna úmitkerlerdiń tolyq tizimin jariialady.
Bul tizimge «Qazaqfilm» kinostýdiiasynyń úsh birdei filmi, atap aitqanda Ermek Tursynovtyń «Shyrakshy», Aqan Sataevtyń «Tomiris» tarihi kartinalary men Farhat Sháripovtyń «Tulǵalyq ósý treningi» dramasy kirdi», - delingen Qazaqfilm habarlamasynda.
Aita ketsek, osy nominatsiia boiynsha úmitkerler tizimine shetel tilinde túsirilgen 65 elden 93 film kirgen.
Ústimizdegi jyly 9 jeltoqsanda «Altyn globýs» júldesine úmitkerlerdiń qysqa tizimi jariialanatyn bolady.
Keler jyldyń basynda otandyq prokatqa shyǵatyn «Shyraqshy» filmi Ekinshi dúniejúzilik soǵysy kezinde nemis qariiadan kinoapparat syiǵa alǵan soldat týraly. Soǵystan soń elge oralǵan ol qartaiǵan shaǵyna deiin el aralap, kinoapparatpen eski filmderdi kórsetýmen ainalysady.
Sonymen qatar, «Tomiris» tarihi filmi bizdiń zamanymyzǵa deiingi VI ǵasyrda bolǵan oqiǵany sýretteidi. Filmde kishkentai qyzdan aibyndy jaýyngerge ainalǵan, saq taipalaryn óz biligi astynda biriktirgen Uly Dalanyń aty ańyzǵa ainalǵan Tomiris patshaiymynyń taǵdyry baiandalady.
Farhat Sháripovtyń «Tulǵalyq ósý treningi» filmi qyryq jastaǵy orta jas kúizelisin keship júrgen, ómirden eshteńe kútpeitin Qanat esimdi bank qyzmetkeri týraly baiandaidy.
«Altyn globýs» júldesiniń 77-shi marapattaý saltanaty 2020 jyly qańtardyń 5-nen 6-na qaraǵan túni ótedi.
