«قازاقفيلمنٸڭ» ٷش فيلمٸ «التىن گلوبۋس» جٷلدەسٸنە ٷمٸتكەرلەر تٸزٸمٸنە كٸردٸ, دەپ حابارلايدى قازاقپارات.
«التىن گلوبۋس» جٷلدەسٸن تابىستايتىن گولليۆۋدتىڭ شەتەل باسپاسٶزٸ قاۋىمداستىعى (HFPA) «شەتەلدٸڭ ٷزدٸك فيلمٸ» نوميناتسيياسىنا ٷمٸتكەرلەردٸڭ تولىق تٸزٸمٸن جارييالادى.
بۇل تٸزٸمگە «قازاقفيلم» كينوستۋديياسىنىڭ ٷش بٸردەي فيلمٸ, اتاپ ايتقاندا ەرمەك تۇرسىنوۆتىڭ «شىراكشى», اقان ساتاەۆتىڭ «توميريس» تاريحي كارتينالارى مەن فارحات شەرٸپوۆتىڭ «تۇلعالىق ٶسۋ ترەنينگٸ» دراماسى كٸردٸ», - دەلٸنگەن قازاقفيلم حابارلاماسىندا.
ايتا كەتسەك, وسى نوميناتسييا بويىنشا ٷمٸتكەرلەر تٸزٸمٸنە شەتەل تٸلٸندە تٷسٸرٸلگەن 65 ەلدەن 93 فيلم كٸرگەن.
ٷستٸمٸزدەگٸ جىلى 9 جەلتوقساندا «التىن گلوبۋس» جٷلدەسٸنە ٷمٸتكەرلەردٸڭ قىسقا تٸزٸمٸ جارييالاناتىن بولادى.
كەلەر جىلدىڭ باسىندا وتاندىق پروكاتقا شىعاتىن «شىراقشى» فيلمٸ ەكٸنشٸ دٷنيەجٷزٸلٸك سوعىسى كەزٸندە نەمٸس قارييادان كينواپپارات سىيعا العان سولدات تۋرالى. سوعىستان سوڭ ەلگە ورالعان ول قارتايعان شاعىنا دەيٸن ەل ارالاپ, كينواپپاراتپەن ەسكٸ فيلمدەردٸ كٶرسەتۋمەن اينالىسادى.
سونىمەن قاتار, «توميريس» تاريحي فيلمٸ بٸزدٸڭ زامانىمىزعا دەيٸنگٸ VI عاسىردا بولعان وقيعانى سۋرەتتەيدٸ. فيلمدە كٸشكەنتاي قىزدان ايبىندى جاۋىنگەرگە اينالعان, ساق تايپالارىن ٶز بيلٸگٸ استىندا بٸرٸكتٸرگەن ۇلى دالانىڭ اتى اڭىزعا اينالعان توميريس پاتشايىمىنىڭ تاعدىرى باياندالادى.
فارحات شەرٸپوۆتىڭ «تۇلعالىق ٶسۋ ترەنينگٸ» فيلمٸ قىرىق جاستاعى ورتا جاس كٷيزەلٸسٸن كەشٸپ جٷرگەن, ٶمٸردەن ەشتەڭە كٷتپەيتٸن قانات ەسٸمدٸ بانك قىزمەتكەرٸ تۋرالى باياندايدى.
«التىن گلوبۋس» جٷلدەسٸنٸڭ 77-شٸ ماراپاتتاۋ سالتاناتى 2020 جىلى قاڭتاردىڭ 5-نەن 6-نا قاراعان تٷنٸ ٶتەدٸ.
