Qazaqstandyq 186 eksporterdiń shyǵyndarynyń bir bóligin memleket jaýyp, osy baǵytta 4,7 mlrd teńge bólgen. Bul týraly OKQ-da ótken baspasóz máslihatynda Saýda jáne integratsiia ministri Baqyt Sultanov málim etti, dep habarlaidy QazAqparat.
«Shetelge ónimin shyǵaratyn eksporterlerdiń shyǵyndarynyń bir bóligin jabý – jańadan qolǵa alynǵan shara. Alaida ol asa qajettilikke qoldaý tetigi ekenin atap ótý kerek. Biyl Vedomstvoaralyq komissiianyń 14-inshi ret ótkizgen otyrysynda jalpy somasy 4,7 mlrd teńge bolatyn 186 eksporterdiń ótinimi maquldandy», - dedi Baqyt Sultanov.
Ministr óz sózin naqty sandarmen shegelei tústi. Atap aitqanda otandyq óńdelgen taýarlardy ilgeriletý boiynsha 39 sýbektiniń jalpy 229,4 mln teńgelik 44 ótinimi, otandyq óńdelgen taýarlardy jetkizý boiynsha 182 sýbektiniń jalpy somasy 4 438,3 mln teńgelik 345 ótinimi maquldanǵan. Kóbi temirjol arqyly taýardy jetkizý jaǵynan kómek suraǵan.
«2019 jyly memlekettiń bul qoldaýyn indýstrialdy-innovatsiialyq baǵyttaǵy 139 sýbekt paidalandy (jalpy somasy 3,9 mlrd teńge). Shyǵyndarynyń bir bóligin jabý arqyly eksporterler kásiporyndarynyń ónerkásiptik óndiris kólemin 9 paiyzǵa, al eksporttan túsken paidany 30 paiyzǵa deiin arttyrýǵa qol jetkizdi», - dedi Baqyt Sultanov.
