Qazaqstanda reseilik jáne ýkrainalyq taýarlar tapshy. Kóbine bul turmystyq himiia men gigiena, kosmetika taýarlaryna qatysty, - dep habarlaidy Tengrinews.kz agenttigi KTK telearnasyna silteme jasap.
Sebebi, elimizge osy ónimderdiń 70 paiyzy Resei men Ýkrainadan tasymaldanady. Al geosaiasi ahýalǵa bailanysty Reseidegi zaýyttar men distribiýtorlyq kompaniialar jabylyp, jumysyn toqtatqan. Qazaqstandaǵy iri saýda oryndary ishki naryqty qamtamasyz etý úshin basqa eldiń taýarlaryna kóshtik dep otyr.
"Iá, rasymen, túrli sebepke bailanysty taýar ýaqtyly kelmei, qinaldyq. Buǵan geosaiasi ahýal tikelei bailanysty. Qazaqstanǵa kóptegen zat, onyń ishinde turmystyq tehnika Reseiden tasymaldanady. Sanktsiia salyna bastaǵanda brendter bul elden kete bastady. Biz Reseiden kelmei qalǵan taýarlardy basqa eldiń ónimimen almastyrdyq. Eń basty maqsatymyz - tutynýshylarǵa ónim usyný. Tapshylyq bolǵanyn jasyrmaimyn", - dedi sýpermarket jelisiniń PR-menedjeri Artiom Krylov.
Qazir eldegi turmystyq zattar satatyn dúken sóreleri bosap qalǵan. Kásipkerler aqpan aiynan beri sabyn, kir jýatyn untaq, ydys-aiaq jýatyn suiyqtyq, shashqa arnalǵa boiaý syndy Reseiden ákelinetin gigiena ónimderi joq ekenin jetkizdi. Balalarǵa arnalǵan taǵamdar, áielderdiń gigienalyq zattary men kosmetikasy da edáýir azaiypty.
Tabystan qaǵylmas úshin biznesmender otandyq jáne Belarýs, Ózbekstan, Túrkiia syndy memleketterdiń ónimderine tapsyrys berip amaldaýǵa kóshken. Soǵan qaramastan, ishki naryqta Ýkraina men Reseiden ákelinetin taýarlardyń úlesi basym eken. Olardyń ornyn tolyq toltyrýǵa ýaqyt kerek. Sondyqtan dúken sórelerinde burynǵydai tańdaý joq. Al baǵa taǵy qymbattaǵan. Otandyq ónim ishki naryqty qamtamasyz etýge qaýqarsyz.
"Qazir reseilik taýarlardyń kóp túri joq. Saýda ókilderiniń aitýynsha, olarda shikizat joq. Reseiden bólek, Eýropadan, Resei arqyly keletin taýarlardyń kóbisi joq. Birqatar brend taýar joǵalyp ketti. Tanymal kremder de joq. Ary qarai saýdany jalǵastyrý úshin Túrkiiadan jetkizilip jatyr. Ózbekstannan da kóp sabyn shyǵarylyp jatyr. Kirjýǵysh untaqtyń kóp túri joq", - dedi satýshy Marat Qazybaev.
