Foto: ashyq derekkóz
Qazaqstanda biylǵy jazda birneshe iri halyqaralyq sport týrniri uiymdastyrylady, dep habarlaidy Ult.kz.
Qazaqstan Respýblikasynyń Týrizm jáne sport ministrligi ótkizgen jumys keńesinde Astana, Túrkistan, Shymkent jáne Aqtaý qalalarynda ótetin halyqaralyq jarystarǵa daiyndyq máseleleri talqylandy.
Jiynda sportshylar men kórermenderdiń qaýipsizdigin qamtamasyz etý, sport nysandarynyń daiyndyǵy, logistika, meditsinalyq qyzmet kórsetý, sheteldik delegatsiialardy ornalastyrý jáne memlekettik organdar arasyndaǵy úilesimdi jumysty uiymdastyrý máselelerine erekshe nazar aýdarylǵan.
Keńes barysynda elordada ótetin bochchadan Álem kýbogine daiyndyq pysyqtaldy. Atalǵan dodaǵa álemniń 25 elinen sportshylar qatysady.
Sonymen qatar:
– 16 elden shamamen 350 sportshy qatysatyn baidarka men kanoede eskek esýden Aziia chempionaty;
– 1600-ge jýyq sportshy baq synaityn taekvondodan (WT) halyqaralyq týrnirler;
– 15 elden 250-ge jýyq sportshy qatysatyn jeńil atletikadan XXXV Ǵusman Qosanov memorialy;
– 50 elden 500-ge jýyq sportshy jinalatyn kýrashtan álem chempionaty;
– 700 sportshy qatysatyn WKF karateden Ortalyq Aziia chempionatyna daiyndyq máseleleri qaraldy.
Týrizm jáne sport ministriniń orynbasary Serik Jarasbaev halyqaralyq jarystardy joǵary deńgeide ótkizýdiń mańyzyn atap ótti. Onyń aitýynsha, mundai aýqymdy sporttyq is-sharalar Qazaqstannyń halyqaralyq arenadaǵy bedelin arttyryp, sport infraqurylymyn damytýǵa jáne buqaralyq sportty nasihattaýǵa serpin beredi.
Kezdesý qorytyndysy boiynsha jaýapty memlekettik organdar men sport federatsiialaryna halyqaralyq jarystarǵa sapaly ári ýaqtyly daiyndalý jóninde naqty tapsyrmalar berildi.
