Qazaqstanda 505,5 myń adam "Spýtnik V" ekpesiniń birinshi dozasyn aldy. Bul halyqtyń 2,6 paiyzyna teń. Vaktsinanyń eki dozasy 108 myń adamǵa (0,8 paiyz) egilgen. Bul týraly beisenbi kúni densaýlyq saqtaý ministrligi habarlady.
Ótken táýlikte elde 70 myńnan astam adamǵa koronavirýsqa qarsy vaktsina salynǵan. Bul vaktsinalaý bastalǵaly beri tirkelgen eń joǵary kórsetkish.
Almatyda vaktsina alǵandar 100 myńnan asqan. Eldegi eń iri qalada vaktsinanyń birinshi dozasy 107 myńnan (qala halqynyń 5,4 paiyzy) astam adamǵa salynǵan. Vaktsina alǵandar sany jóninen ekinshi orynda Almaty oblysy tur. Munda 59 myńnan astam adamǵa salynǵan.
Elde vaktsinalaý naýqany 1 aqpanda bastalǵan. Birinshi kezekte ekpe dárigerlerge salyndy. Jaqynda Qazaqstan prezidenti Qasym-Jomart Toqaev ekpe naýqany sylbyr júrip jatyr dep, densaýlyq saqtaý ministri Aleksei Tsoidyń jumysyn synǵa alǵan. Jurt arasynda vaktsinanyń qaýipsizdigine senbeitinder kóp, kei sarapshy vaktsina naýqany jaily halyqqa durys aqparat berilmeidi dep sanaidy.
Resmi málimet boiynsha, Qazaqstanda koronavirýs pnevmoniiasyn qosqanda 330 myńnan astam adamnan Covid anyqtalǵan. 4 myńnan astam adam qaitys bolǵan. Qazaqstan Ortalyq Aziiada naýqastar men koronavirýspen bailanysty adam ólimi kórsetkishi boiynsha birinshi orynda tur.
