Qazaqstannyń ipotekalyq kompaniiasy (QIK) nesieleýdiń jańa túrin tanystyrdy, dep habarlaidy QazAqparat.
«Orda» ipotekasyn qazaqstandyqtar osy aidyń sońynan bastap rásimdei alady. Jańa baǵdarlamanyń arqasynda baspanasyzdar jańa nemese qoldanystaǵy úilerge qol jetkizedi. Sonymen qatar, úmitkerlerdiń basynda baspana bar-joǵy mańyzdy emes. Nesie QIK áriptesteri bolyp sanalatyn EDB (ekinshi deńgeili bankter) arqyly beriledi», - dedi kompaniiadan.
Eger úmitkerler tólem qabiletin dáleldei alsa, ipotekalyq qaryz boiynsha jyldyq paiyzdyq mólsherleme - 12% bolmaq. Al eger tolyq dáleldei almasa, 14%-ben beriledi. «Orda» arqyly eń kóp degende 40 mln teńgege deiingi somaǵa baspana alýǵa bolady. Qaryz 20 jylǵa beriledi. Bul ipoteka Qazaqstannyń 16 qalasynda júrgiziledi. Biraq, klienttiń jasy 21-den asyp, nesie merzimi aiaqtalǵansha zeinet jasyna jetpeýi tiis», - dedi QIK-tan.
«Orda» ipotekasy boiynsha qaryz alý úshin klient úi qunynyń 30%-yn aldyn ala tólep, tólem qabiletin tolyq rastaýy qajet. Al tólem qabiletin rastai almasa, úi qunynyń 50 %-yn aldyn ala salýy kerek. Sonymen qatar, alǵashqy salym bolmaǵan jaǵdaida klient óziniń basyndaǵy jyljymaityn múlkin kepilge qoisa bolady.
«Bizdiń ipoteka kóptegen qazaqstandyqtardyń baspana jaǵdaiyn túzetýge múmkindik beredi. Boryshkerler ózderine yńǵaily parametrler arqyly qolaily ailyq tólem belgilei alady», - dedi QIK basshysy Ádil Muhamedjanov.
