Qazaqstandyqtarǵa jalǵa beriletin aýyl sharýashylyǵy maqsatyndaǵy jer ýchaskeleriniń shekti eń joǵarǵy ólshemin bekitý týraly arnaiy qaýly qabyldanady. Bul týraly QR Aýyl sharýashylyǵy ministrligi jer reformasy komissiiasynyń otyrysynda ekonomikalyq jumys tobynyń jetekshisi Aqylbek Kúrishbaev aitty, dep habarlaidy "Ult aqparat".
«Ekonomikalyq máseleler boiynsha jumys tobynyń otyrysyna qazaqstandyqtarǵa jalǵa beriletin aýyl sharýashylyǵy maqsatyndaǵy jer ýchaskeleriniń shekti eń joǵarǵy ólshemin bekitý týraly QR Úkimetiniń qaýlysyn qabyldaý máselesi qaraldy. Bul – óte ózekti másele. Bul usynysty jumys tobynyń barlyq múshesi qoldady», - deidi ekonomikalyq jumys tobynyń basshysy Aqylbek Kúrishbaev.
Onyń aitýynsha, taǵy bir másele – sybailas jemqorlyq táýekelderin bolǵyzbas úshin saýda-sattyqsyz (konkýrssyz, aýktsionsyz) jer berý kezinde investitsiialyq jobany aiqyndaý tártibin belgileý qaǵidalaryn qabyldaý.
«Bul norma tiisti zańda qaralyp jatyr. Qazirgi ýaqytta kásipkerlik kodeksine ózgeris engizilýde. Bul máseleni kún tártibinen alyp, zańǵa engizý kerek degen usynysty otyrysqa qatysqandardyń bári qoldady», - deidi ol.
