Qazaqstan qor birjasy (KASE) basqarma tóraǵasynyń orynbasary Natalia Horoshevskaia 28 aqpandaǵy valiýtalyq saýda-sattyq qalai ótkenin málimdedi, - dep habarlaidy Tengrinews.kz tilshisi.
"Qazirgi ýaqytta dollardyń saýda-sattyǵy aiaqtaldy. Ol 30 minýtqa sozyldy. Bizdiń birjada ótkiziletin ózge shetel valiýtalarynyń saýda-sattyǵy shtattyq rejimde ótti. Qazir dollardan basqa, iýan, evro jáne rýbl qol jetimdi. Qor naryǵynda baǵaly qaǵazdar boiynsha saýda-sattyq shtattyq rejimde ótkizildi. Olar reglament boiynsha jabylady. Dollar saýda-sattyǵy boiynsha Frankfýrt aýktsiony rejimi engizildi. Aýktsion barysynda Birjanyń ár múshesi AQSh dollaryn satyp alýǵa jáne satýǵa ótinish bere alady, eger jaǵdai ózgerse, ótinimderdi qaitaryp ala alady. Osyndai ádispen ótkiziletin saýda-sattyq kezdeisoq sátte jabylady jáne kýrs qarsy ótinimderdiń eń kóp kólemi qanaǵattandyrylatyndai etip tirkeledi", - dep habarlady spiker.
KASE basqarma tóraǵasy orynbasarynyń aitýynsha, saýda-sattyqtyń jalpy kólemi 159 million 500 myń dollardy qurady. Bul sońǵy úsh aidaǵy ortasha kúndelikti saýda-sattyq kóleminiń eń joǵary kórsetkishterine sáikes keledi. Ortasha alynǵan baǵam 495 teńge. Bul dollardy eń úlken kólemde satyp alýǵa jáne satýǵa ótinimder berilgen baǵam. 25 aqpan kúni keshki saýda-sattyq qorytyndysy boiynsha belgilengen burynǵy baǵammen salystyrǵanda dollar teńgege shaqqandaǵy baǵamy 6,7 paiyzǵa qymbattady.
