2019 jyldyń 3 aiynda Qazaqstanda 300 myńnan astam avtokólik tirkeýge qoiyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaidy "Ult aqparat".
«Esepti kezeńde ákimshilik politsiia organdary tirkeýge 323 988 avtokólikti qoidy. Atalǵan kórsetkish ótken jyldyń sáikes kezeńinen 13,8 paiyzǵa artyq. Onyń ishinde 305 460-sy ekinshi ret tirkelgender úlesinde, iaǵni bir adamnan ekinshi adamnyń atyna aýystyrylǵan kólikter sanatyna jatqyzyldy. Ósim 2018 jylmen salystyrǵanda 13,4 paiyzǵa jetti. Al alǵash ret tirkelgen kólik quraldarynyń sany 18 528-di qurady. Ol ótken jylǵyǵa qaraǵanda, 21,1 paiyzǵa joǵary», - dep atap kórsetilgen baspasóz baianynda.
Biylǵy qańtar-naýryzda Qazaqstan aýmaǵynda 4 elektromobil tirkelgen eken.
«QazAvtoÓnerkásiptiń» habarlaýynsha, esepti kezeńde qaita tirkelgen kólikterdiń úshten ekisiniń astamyn (70,7 paiyzy) paidalaný merzimi 10 jyldan asqan kólikter qamtyǵan.
Atap aitqanda, 20 jyldan asqandardyń úlesi 131 882 (43,2 paiyz) bolsa, 11-den 20 jylǵa deiingiler 27,5 paiyzdy (84 087 kólik) qurady. Al 4-ten 7 jylǵa deiin - 60 597 (19,8 paiyz), 8-den 10 jylǵa deiin - 18 088 (5,9 paiyz), 1-den 3 jylǵa deiingi kólikter sany 10 322-ge jetti. Sonymen qatar, paidalaný merzimi 1 jylǵa jetpegen kólikterdiń úlesi 0,2 paiyz (484 kólik) boldy.
«Kelisimshart rásimderine qaraǵanda, otandyq avtoparktiń eskirýiniń úrdisi oryn alǵanyn baiqatyp otyr», - delingen «QazAvtoÓnerkásip» habarlamasynda.
