Elimizde sońǵy 10 jylda bala týý kórsetkishi 4,3 paiyzǵa artty, dep habarlaidy QazAqparat.
Bul týraly «Qazaqstandaǵy balalar semizdiginiń taralýyn zertteý» konferentsiiasynda balalar densaýlyǵy boiynsha eldegi jaǵdaiǵa toqtalǵan QR DSM Ana men bala densaýlyǵyn qorǵaý departamenti direktorynyń orynbasary Oljas Ysqaqov aitty.
«Qazaqstanda sońǵy 10 jylda bala týý kórsetkishi 4,3 paiyzǵa artty. Byltyr Shymkent qalasy, Mańǵystaý, Túrkistan, Qyzylorda, Atyraý, Almaty, Jambyl, Aqtóbe oblystary men elordada dúnie esigin ashqan náresteler kóbeigen. 1 jasqa deiingi sábiler arasynda tynys alý júiesindegi aýrýlar (49,7 paiyz) jii kezdesedi. Al 18 jasqa deiingi balalar arasynda as qorytý júiesiniń aýrýlary – 9,4%, júike júiesiniń aýrýlary – 6,1%, kóz aýrýlary – 5,2%, qan aýrýlary – 5,1% tirkeldi», - dedi ol.
Ótken jyly el aýmaǵynda 447 290 balanyń kindigi kesilgen. Onyń ishinde 25 776 náreste shala týyldy.
«Byltyr 5 mln 600 myń bala meditsinalyq profilaktikalyq tekseristen ótýi tiis bolǵan. Alaida tek 4,5 mln bala tekserildi. Buǵan koronavirýsqa bailanysty karantin shekteýleriniń kúsheitilýi, oqýshylardyń onlain formatta oqýy sebep bolǵan. Tekserilgen balalardyń 7,4 paiyzynan alǵash ret qandai da bir syrqat anyqtaldy», - dedi Oljas Ysqaqov.
