Memlekettik kirister komiteti salyq tóleýden jaltarǵan 100 jeke tulǵanyń tizimin jariialady, dep habarlaidy "Ult aqparat".
Bul azamattardyń memleket aldyndaǵy jalpy boryshy 286 019 395 teńgeni qurap otyr. Onyń 175 354 401 teńgesi – negizgi borysh somasy, al qalǵan 110 664 995 teńge – ósimpul .
Salyq boiynsha eń kóp bereshegi bar azamat Qaraǵandy oblysynda turady. Asqar Nábievtiń jer salyǵy boiynsha (BSK 104302) negizgi borysh somasy 37 163 849 teńge, eseptelgen ósimpuly - 28 192 533 teńge. Jalpy qaryzy 65 356 383 teńgeni qurap otyr.
Elde salyǵy boiynsha ósimpul somasy negizgi borysh somasynan asyp ketken azamattar da bar. Mysaly, Nur-Sultan qalasynyń turǵyny Talǵatbek Iliasovtyń jer salyǵy boiynsha jalpy bereshek somasy 19 050 875 teńge, onyń ishinde negizgi boryshy - 8 685 027 teńge, ósimpuly - 10 365 848 teńge.
Kólik salyǵy (BSK 104402) boiynsha boryshkerler tizimin taǵy da Qaraǵandy oblysy bastap otyr. Fadis Mýstakimov bul salyq túri boiynsha jalpy 6 081 323 teńge qaryz jinaǵan. Onyń tóleýi tiis negizgi somasy - 4 059 318 teńge, eseptelgen ósimpuly - 2 022 005 teńge.
Keibir qazaqstandyqtar múlik salyǵy (BSK 104102) boiynsha da qaryz jinap úlgergen. Mysaly, Jambyl oblysynyń turǵyny Erlan Toksanbaevtyń jalpy bereshek somasy 576 191 teńge, onyń ishinde negizgi borysh somasy - 335 811 teńge, ósimpul - 240 380 teńge.
Múlik, jer, kólik salyǵy boiynsha bereshegi bar azamattardyń jalpy tizimin myna jerden kórýge bolady.
Aita keteiik, memlekettik kirister organdary salyq boiynsha bereshegi bar azamattar tizimin jariialaý úrdisin aldaǵy ýaqytta da jalǵastyrýdy kózdep otyr.
Qazirgi ýaqytta Qazaqstanda salyqtyq raqymshylyq júrýde: aǵymdaǵy jyldyń 31 jeltoqsanyna deiin (qosa alǵanda) negizgi borysh somasyn tólegen azamattardyń ósimpuly esepten shyǵarylatyn bolady.
Salyq tóleýshiler boryshtarynyń bar-joǵyn Memlekettik kirister komitetiniń saitynda myna silteme boiynsha teksere alady.
