مەملەكەتتٸك كٸرٸستەر كوميتەتٸ سالىق تٶلەۋدەن جالتارعان 100 جەكە تۇلعانىڭ تٸزٸمٸن جارييالادى, دەپ حابارلايدى "ۇلت اقپارات".
بۇل ازاماتتاردىڭ مەملەكەت الدىنداعى جالپى بورىشى 286 019 395 تەڭگەنٸ قۇراپ وتىر. ونىڭ 175 354 401 تەڭگەسٸ – نەگٸزگٸ بورىش سوماسى, ال قالعان 110 664 995 تەڭگە – ٶسٸمپۇل .
سالىق بويىنشا ەڭ كٶپ بەرەشەگٸ بار ازامات قاراعاندى وبلىسىندا تۇرادى. اسقار نەبيەۆتٸڭ جەر سالىعى بويىنشا (بسك 104302) نەگٸزگٸ بورىش سوماسى 37 163 849 تەڭگە, ەسەپتەلگەن ٶسٸمپۇلى - 28 192 533 تەڭگە. جالپى قارىزى 65 356 383 تەڭگەنٸ قۇراپ وتىر.
ەلدە سالىعى بويىنشا ٶسٸمپۇل سوماسى نەگٸزگٸ بورىش سوماسىنان اسىپ كەتكەن ازاماتتار دا بار. مىسالى, نۇر-سۇلتان قالاسىنىڭ تۇرعىنى تالعاتبەك يلياسوۆتىڭ جەر سالىعى بويىنشا جالپى بەرەشەك سوماسى 19 050 875 تەڭگە, ونىڭ ٸشٸندە نەگٸزگٸ بورىشى - 8 685 027 تەڭگە, ٶسٸمپۇلى - 10 365 848 تەڭگە.
كٶلٸك سالىعى (بسك 104402) بويىنشا بورىشكەرلەر تٸزٸمٸن تاعى دا قاراعاندى وبلىسى باستاپ وتىر. فاديس مۋستاكيموۆ بۇل سالىق تٷرٸ بويىنشا جالپى 6 081 323 تەڭگە قارىز جيناعان. ونىڭ تٶلەۋٸ تيٸس نەگٸزگٸ سوماسى - 4 059 318 تەڭگە, ەسەپتەلگەن ٶسٸمپۇلى - 2 022 005 تەڭگە.
كەيبٸر قازاقستاندىقتار مٷلٸك سالىعى (بسك 104102) بويىنشا دا قارىز جيناپ ٷلگەرگەن. مىسالى, جامبىل وبلىسىنىڭ تۇرعىنى ەرلان توكسانباەۆتىڭ جالپى بەرەشەك سوماسى 576 191 تەڭگە, ونىڭ ٸشٸندە نەگٸزگٸ بورىش سوماسى - 335 811 تەڭگە, ٶسٸمپۇل - 240 380 تەڭگە.
مٷلٸك, جەر, كٶلٸك سالىعى بويىنشا بەرەشەگٸ بار ازاماتتاردىڭ جالپى تٸزٸمٸن مىنا جەردەن كٶرۋگە بولادى.
ايتا كەتەيٸك, مەملەكەتتٸك كٸرٸستەر ورگاندارى سالىق بويىنشا بەرەشەگٸ بار ازاماتتار تٸزٸمٸن جارييالاۋ ٷردٸسٸن الداعى ۋاقىتتا دا جالعاستىرۋدى كٶزدەپ وتىر.
قازٸرگٸ ۋاقىتتا قازاقستاندا سالىقتىق راقىمشىلىق جٷرۋدە: اعىمداعى جىلدىڭ 31 جەلتوقسانىنا دەيٸن (قوسا العاندا) نەگٸزگٸ بورىش سوماسىن تٶلەگەن ازاماتتاردىڭ ٶسٸمپۇلى ەسەپتەن شىعارىلاتىن بولادى.
سالىق تٶلەۋشٸلەر بورىشتارىنىڭ بار-جوعىن مەملەكەتتٸك كٸرٸستەر كوميتەتٸنٸڭ سايتىندا مىنا سٸلتەمە بويىنشا تەكسەرە الادى.
