Qazaqstanda ortasha jalaqy taǵy da ósip, 162 myń teńgeden asty. Bul týraly ulttyq ekonomika ministrligi habarlady, - dep jazady sputniknews.kz.
Esterińizde bolsa, ministr Timýr Súleimenov úkimet otyrysynda biylǵy jyldyń qańtar-sáýirinde ortasha ailyq jalaqy 152,3 myń teńgeni qurap, naqty kóriniste 1,2%-ǵa óskenin málimdegen edi. Al 2018 jyldyń ekinshi toqsanynda bir qyzmetkerdiń ortasha ailyq ataýly jalaqysy 162 751 teńgeni qurap otyr.
Salalyq qurylymda eń úlken ataýly jalaqy qarjy jáne saqtandyrý qyzmetinde –335,3 myń teńge (ortasha respýblikalyq deńgeiden 2,1 esege asty), kásibi, ǵylymi jáne tehnikalyq qyzmette – 273,2 myń teńge (1,7 esege asty), ónerkásip salasynda – 224,7 myń teńge (1,4 esege asty), aqparat jáne bailanys salasynda – 238,4 myń teńge (1,5 esege asty), qurylys salasynda – 212,8 myń teńge (1,3 esege asty) belgilendi.
Eń tómengi ataýly jalaqy aýyl, orman jáne balyq sharýashylyǵy qyzmetkerlerinde belgilendi – 93,7 myń teńge, bul respýblika boiynsha orta kórsetkishten 42,4%-ǵa tómen.
Óńirlik bóliniste eń joǵarǵy jalaqy Atyraý oblysynda belgilendi – 291,3 myń teńge, bul ortasha respýblikalyq kórsetkishten shamamen 1,8 esege asady. Jambyl oblysynda munyń shamasy 111,2 myń teńgeni qurady, bul el boiynsha ortasha deńgeiden 31,7%-ǵa tómen.
