Qarjy ministrligi Memlekettik satyp alý zańnamasy departamentiniń direktory Sábit Ahmetov konkýrs ótkizýdiń jańa tásilderin aityp berdi, - dep habarlaidy Tengrinews.kz tilshisi.
"Bazany toltyrý boiynsha úlken jumys atqaryldy, qazir verifikatsiia, elektron depozitariige engizilgen málimetterdiń durystyǵyn tekserý boiynsha jumystar júrgizilip jatyr. Elektron depozitariidi engizý arqyly adamnyń jumys tájiribesin avtomat túrde esepteýge jáne sybailas jemqorlyq táýekelderin boldyrmaýǵa múmkindik bolady. Bul rette, bizdiń oiymyzsha, satyp alýdaǵy sybailas jemqorlyqty joiýdyń jalǵyz sharty - ónim jiberýshini tańdaý protsesinde adami faktordy alyp tastaý", - dedi Ahmetov OKQ-niń onlain-brifinginde.
Onyń aitýynsha, baldyq júieni qoldaný arqyly satyp alýdyń jańa tásilderin engizý máselesi pysyqtalyp jatyr.
"Bul tásilde memlekettik satyp alý protsesine adamdar múlde qatyspaidy jáne ol konkýrstyq komissiiasyz júzege asyrylady. Memlekettik satyp alýdyń elektron júiesin keńinen integratsiialaý arqyly veb-portalda ónim jiberýshilerge avtomat túrde reiting beriledi.
Mysaly, qandai da bir ónim jetkizýshisiniń bedeli jaqsy, iaǵni jumys tájiribesi bar, qarjylyq turaqtylyq kórsetkishi joǵary, usynatyn kepildik merzimi uzaq bolsa oǵan tiisti oń upailar avtomat túrde beriledi. Al bedeli nashar uiymdarǵa, mysaly, ol buryn satyp alýǵa josyqsyz qatysýshylardyń tiziliminde bolǵan nemese oǵan qatysty aiyppul sanktsiialary qoldanylsa, turaqsyzdyq faktileri anyqtalsa, onda mundai áleýetti ónim berýshilerge avtomat túrde teris ball qoiylady", - dep túsindirdi Ahmetov.
Ol memlekettik satyp alý veb-portalynda baǵa jáne sapa ólshemderi negizinde eń kóp ball jinaǵandar arasynda konkýrs jeńimpazy avtomat túrde anyqtalatynyn aitty.
"Jetkizýshini avtomat túrde tańdaý printsipi men tásilin biz búgingi tańda memlekettik satyp alýdyń elektron júiesinde kóshbasshylardyń biri sanalatyn Ońtústik Koreianyń tájiribesi negizinde usynamyz. Joǵaryda atalǵan barlyq jańashyldyq pen usynys qazir Parlament Májilisiniń qaraýynda jatqan memlekettik satyp alý máseleleri boiynsha zań jobasy aiasynda pysyqtalady", - dep túiindedi ol.
