«Qazaqstan Respýblikasynyń keibir zańnamalyq aktilerine kúzet qyzmeti máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasyna QR Parlamenti depýtattarynyń bir toby bastamashylyq etti. Onyń negizgi maqsaty - kúzet qyzmeti salasyndaǵy zańnamany jetildirý.
«Qazaqstandaǵy jeke kúzet uiymdary azamattar men zańdy tulǵalardyń ómirin, densaýlyǵyn jáne múlkin qorǵaý jóninde quqyqtyq tártipti qamtamasyz etýde memlekettik organdarǵa belsendi kómek kórsetý boiynsha mańyzdy missiiany oryndaidy. Qazirgi kezde Qazaqstanda 5127 jeke kúzet uiymy bar. Bul rette kúzetý jáne qarýdy alyp júrý quqyna litsenziiasy bar bilikti kúzetshilerdiń sany 97 116 adamǵa jetti. Ótken jyly jeke kúzet kúshteri tarapynan 605 qylmystyq quqyqbuzýshylyq, 11 myńnan astam ákimshilik quqyqbuzýshylyq anyqtaldy. 11,5 myń quqyq buzýshy ustalyp, politsiiaǵa berildi. Sonymen qatar, 1200-ge jýyq urlyqtyń aldyn aldy», - dedi Májilis depýtaty Arman Qojahmetov
Zań jobasynda kúzet qyzmetterin kórsetý sapasyn arttyrýǵa, azamattardyń múliktik jáne jeke quqyqtaryn qorǵaýdy jetildirýge ári osy saladaǵy qoldanystaǵy zańnama normalarynyń jekelegen sáikessizdikterin joiýǵa baǵyttalǵan birqatar túzetýler kózdeledi.
Zań jobasynda QR Eńbek kodeksine jáne «Kúzet qyzmeti týraly» Zańyna ózgerister men tolyqtyrýlar qarastyrylǵan.
«Atap aitqanda, Qazaqstan Respýblikasy Eńbek kodeksiniń 52-babyna jumysker zańnamada belgilengen, kásiptik qyzmetke qoiylatyn qosymsha arnaiy talaptarǵa sai kelmegen jaǵdaida jumys berýshiniń bastamasymen eńbek shartyn buzý negizderin naqtylaýǵa qatysty túzetý engizý usynylyp otyr. Budan basqa, «Kúzet qyzmeti týraly» QR Zańynan buryn teris sebeptermen jumystan shyqqan adamdarǵa kúzetshi laýazymynda jumys isteýge tyiym salý týraly normalardy alyp tastaý usynylady, ótkeni zańnamada «teris sebeptermen jumystan shyǵarý» degen uǵym joq jáne Eńbek kodeksinde osy negizder boiynsha eńbek sharttaryn buzý kózdelmeidi», - dep túsindirdi depýtat.
Sonymen qatar, QR Eńbek kodeksinde jáne «Kúzet qyzmeti týraly» Zańynda ártúrli túsindiriletin «arnaýly kiim» uǵymynyń anyqtamasyndaǵy túrli túsinikti joiý maqsatynda keibir túzetýler engizý usynylǵan.
