Qazaqstanda qurastyrylǵan kólik qunynda ýtilalym eshqashan bolǵan emes. Bul týraly QR Indýstriia jáne infraqurylymdyq damý vitse-ministri Marat Qarabaev aitty, dep habarlaidy QazAqparat.
«Bizdiń de jumysta jibergen qateligimiz bolar, ýtilalym týraly qoǵamǵa durys túsindire almadyq. Sony paidalanyp, keibir qoǵam belsendileri ýtilalym týraly qoǵamda shyndyqqa janaspaityn pikir, uǵym qalyptastyryp otyr. Otandyq kóliktiń baǵasynda eshqashan kádege jaratý alymy bolmaǵan. Bul rette myna máseleni atap ótken jón. Jeńil kólik jaiynda aitar bolsaq, KIA, Hyundai modelderine halyqtyń suranysy joǵary. Qazaqstanda KIA, Hyundai, Chevrolet, JAC, Lada siiaqty avtomobilder tolyǵymen qurastyrylady. Olardyń óndirisi osynda qalyptasqan. Osy modelderdi alǵanda halyq eshqashan ýtilalym tólemegen», - dedi vitse-ministr Ortalyq kommýnikatsiialar qyzmetindegi baspasóz máslihatynda.
Osy rette ol 2021 jyly elimizdiń naryǵynda satylǵan kólikterdiń 65 paiyzy ózimizde qurastyrylǵandyǵyn atap ótti.
«Statstikaǵa júginer bolsaq, byltyr naryqta satylǵan mashinalardyń 65 paiyzyn otandyq kólikter quraidy. Bul degenimiz ne? Iaǵni, jańa kólik satyp alǵan qazaqstandyqtardyń 65 paiyzy kádege jaratý alymyn tólegen joq. Qalǵan 35 paiyz importtyq kóliktiń basym bóligi Mercedes, BMW siiaqty premiým sanatyndaǵy mashinalar. Bul kólikterge ýtilalym tólendi. Biraq, túsken qarajat erteń eldiń igiligine, iaǵni, halyqqa jeńildetilgen avtonesie berýge jaratylady», - dedi Marat Qarabaev.
