Qazaqstan Ulttyq Bankiniń Qarjylyq turaqtylyq jáne zertteýler departamenti direktorynyń mindetin atqarýshy Erulan Mustafin elimizde kreditke degen suranys artqanyn málimdedi, dep jazady Ulysmedia.kz.
Bank málimetinshe, shaǵyn jáne orta biznes ókilderi tarapynan kredit alýǵa suranys joǵarylaǵan.
“II toqsanda júrgizilgen saýalnama qorytyndysy boiynsha, kredittik resýrstar qunynyń ósýine jáne kreditteý talaptarynyń birshama kúsheitilgenine qaramastan, biznes tarapynan kreditke degen suranys aitarlyqtai artty. Bul kórsetkish, ásirese, shaǵyn jáne orta biznes arasynda joǵary.
Shaǵyn biznes tarapynan kreditke suranystyń ósýi bankterdiń jartysynda, álbette, iri bankterde baiqaldy. Esepti toqsanda kelip túsken kredittik ótinimderdiń jalpy sany toqsannan toqsanǵa (budan ári – t-t) 19%-ǵa – 310 myńǵa deiin ósti, al ótinimniń ortasha mólsheri t/t 8%-ǵa – 23,3 mln teńgege deiin tómendedi. Ótinimder sanynyń ósýi, ásirese, iri bankterdiń shaǵyn bizneske arnalǵan skoringtik onlain kredittik ónimderdi belsendi damytýymen, sondai-aq osy ónimderdi jekelegen bankterdiń iske qosýymen bailanysty. Memlekettik baǵdarlamalar aiasynda kreditteýdiń qaita jandaný úrdisi esepti toqsandaǵy suranysqa oń áserin tigizdi.
Bizneske kredit berý talaptary birshama kúsheidi. Bizneske beriletin kredit boiynsha syiaqy mólsherlemesiniń, eń aldymen, iri jáne orta kásipkerlik sýbektileri úshin ósýi toqtaǵan joq.
Kelesi toqsanda jekelegen bankter iri biznes tarapynan kreditke suranystyń birshama ulǵaiýyn kútedi, ShOB boiynsha suranys indeksi ortasha eseppen I toqsannyń deńgeiinde saqtalady. Bankterdiń kóbi kelesi toqsanda bizneske beriletin kreditter boiynsha syiaqy mólsherlemesiniń ósýin kútpeidi.
2022 jyldyń II toqsanynda bólshek qaryzdarǵa suranys ipotekalyq qaryz segmentinde azaidy, al tutynýshylyq qaryzdarǵa suranys ulǵaidy.
Bankter ipotekalyq qaryzdarǵa suranystyń tómendeýin – jeńildikpen beriletin kreditterge degen qoljetimdiliktiń qysqarýymen, sondai-aq, halyqtyń negizgi suranysy ótken toqsanda 2022 jylǵy 1 sáýirden bastap turǵyn úi satyp alý jáne/nemese jaǵdaiyn jaqsartý maqsatynda zeinetaqy jinaqtaryn paidalaný boiynsha jetkiliktilik shegin arttyrýǵa deiin ótken toqsanda halyqtyń negizgi suranysynyń iske asyrylǵanymen bailanystyrady”, – delingen bank habarlamasynda.
