Foto: Aqshamnews.kz
1 qazan – dúnie júzinde, sonyń ishinde Qazaqstanda da Halyqaralyq qarttar kúni retinde keńinen atalyp ótedi, dep habarlaidy Ult.kz.
Elimizde búginde 2,5 millionnan astam zeinetker turady. Árbir azamattyń laiyqty qartaiýyn qamtamasyz etý – Úkimettiń áleýmettik saiasatynyń negizgi basymdyqtarynyń biri.
Memleket qarttarǵa áleýmettik qoldaý kórsetý jáne zeinetaqymen qamsyzdandyrý júiesin jetildirý baǵytynda dáiekti sharalardy iske asyrýda. QR Áleýmettik kodeksine sáikes eńbek ótiline qarai zeinetaqy tólemderi jyl saiyn artyp otyrady.
2025 jyldyń 1 qańtarynan bastap yntymaqty zeinetaqy mólsheri 8,5%-ǵa ulǵaidy. Sonymen qatar eń tómengi kúnkóris deńgeiiniń ózgerýine sáikes bazalyq zeinetaqy indeksteldi. Memleket basshysynyń tapsyrmasyna sáikes, bazalyq zeinetaqyny kezeń-kezeńimen arttyrý jalǵasýda: eń tómengi kórsetkish 65-ten 70%-ǵa, al eń joǵarǵysy 105-ten 110%-ǵa deiin ósedi.
Qart adamdardy qoldaý maqsatynda respýblikada 127 Belsendi uzaq ómir súrý ortalyǵy jumys isteidi. 2025 jyly olardyń qyzmetin qarjylandyrýǵa jergilikti biýdjetterden 7,5 mlrd teńge bólindi. Bul ortalyqtar ioga, skandinaviialyq júris, tsifrlyq saýattylyqty arttyrý, til jáne kásipkerlik kýrstaryn qosa alǵanda, aǵa býynnyń belsendi ómir súrýine múmkindik beretin túrli qyzmetter kórsetedi.
1 qazanda elimizde Qarttar kúnine orai arnaiy ailyq bastalady. Onyń aiasynda óńirlerde kezdesýler, mádeni is-sharalar, ambýlatoriialyq-emhanalyq uiymdarda Ashyq esik kúnderi ótkiziledi.
Aita keteiik, Halyqaralyq qarttar kúnin Birikken Ulttar Uiymy Bas Assambleiasy 1990 jylǵy 14 jeltoqsanda bekitken. Merekeniń basty maqsaty – qariialardyń qoǵamdaǵy eńbegin qurmetteý, olardyń ómir sapasyn jaqsartýǵa jáne áleýmettik qoldaýyna nazar aýdarý.
Oqi otyryńyz: Elimizde 100 jastan asqan 448 azamat ómir súrip jatyr
