QR Memlekettik qyzmet isteri jáne sybailas jemqorlyqqa qarsy is-qimyl agenttigi jemqorlyq úshin sottalǵan laýazymdy tulǵalardyń statistikasyn jariialady, dep xabarlaidy QazAqparat tilshisi.
Agenttik tóraǵasynyń orynbasary Oljas Bektenovtyń aitýynsha, osy ýaqytqa deiin elimizde 2 Premer-Ministr, 22 ministr, agenttik tóraǵasy men olardyń orynbasary, 17 oblys pen qala ákimi, 11 ulttyq kompaniia basshysy, 8 general jemqorlyq úshin sottaldy.
"Degenmen sońǵy eki jyldyń ishinde sybailas jemqorlyq áreketteriniń sany azaiyp keledi. Biz onyń bári jan-jaqty nasixat jumystarymen tyǵyz bailanysty dep sanaimyz. Sosyn qoǵamdyq sana da ózgerip jatyr. 2016 jyldan beri anyqtalǵan jemqorlyq faktileriniń sany 23 protsentke azaidy", - dedi O.Bektenov memlekettik qyzmettiń jańa formatyn qalyptastyrýǵa arnalǵan paneldik sessiiada.
Aita keteiik, búgingi jiynda agenttik basshylyǵy Sybailas jemqorlyqqa qarsy is-qimyl ulttyq biýrosyn ońtailandyrýdyń nátijesin de jariialady. Oljas Bektenovtiń aitýynsha, osy ýaqytqa deiin Sybailas jemqorlyqqa qarsy is-qimyl ulttyq biýrosynda 250-ge jýyq basshylyq qyzmeti qysqartyldy. Budan bólek, artyq qurylymdar ońtailandyryldy. Sonyń esebinen shuǵyl tergeý qyzmeti kúsheitildi.
«Buryn Ulttyq biýroda basshylar men qyzmetkerlerdiń ara qatynasy 1:2, iaǵni bir bastyqtyń qol astynda eki adam bolsa, qazir atalǵan kórsetkish damyǵan memleketterdiń deńgeii - 1:8-ge jetti. Sosyn quqyq qorǵaýshylardy ashyq konkýrs negizinde jumysqa qabyldaityn boldy.
Jalpy, Ulttyq biýro boiynsha shamamen 1 milliard teńge únemdeldi. Osynyń nátijesinde qyzmetkerlerdiń jalaqysy 2 eseden artyq ósti. Bul jerde prezidenttik ósimaqy da bar. Oǵan taǵy únemdelgen qarjynyń ústemaqysy qosylady. Búginde Sybailas jemqorlyqqa qarsy is-qimyl ulttyq biýrosy eń joǵary jalaqy alatyn quqyq qorǵaý organy bolyp sanalady», - deidi O.Bektenov.
