Premer-ministr Álihan Smaiylov pen Adani Group kompaniiasynyń prezidenti Gaýtama Adani Qazaqstanda birqatar investitsiialyq jobany iske qosý perspektivalaryn talqylady, - dep habarlaidy "Ult aqparat" primeminister.kz saityna silteme jasap.
Kólik jáne logistika, energetika, taý-ken metallýrgiia kesheni, munai-himiia, aýyl sharýashylyǵy jáne t. b. salalarda jobalardy iske asyrý múmkindikteri qaraldy.
Premer-ministr munyń barlyǵy Qazaqstan ekonomikasy úshin basym baǵyttar ekenin atap ótti.
"Osy oraida Adani Group-pen yntymaqtastyqtyń áleýeti zor dep sanaimyz jáne sizdiń kompaniiańyzdyń bizdiń elimizdegi iskerlik bailanystardy keńeitý nietin quptaimyz", - dedi Álihan Smaiylov.
Ol respýblikada jańa investitsiialyq jobalardy iske qosý jáne jalpy kásipkerlik qyzmetti júrgizý úshin qolaily jaǵdailar jasalǵanyn aitty. Sonymen qatar, Úkimet Qazaqstanda holding jobalaryn iske asyrý úshin jan-jaqty qoldaý kórsetýge daiyn.
Óz kezeginde Gaýtama Adani kompaniia birinshi kezekte azamattyq aviatsiia, munai-himiia sektory, kólik-logistikalyq infraqurylym, jańartylatyn energiia kózderin damytý jáne "jasyl" sýtegin óndirý boiynsha jobalarǵa qyzyǵýshylyq tanytyp otyrǵanyn atap ótti.
"Biz uzaqmerzimdi investitsiialar salýǵa múddelimiz jáne Qazaqstanda qandai múmkindikter, qandai jobalar boiynsha ortaq qyzyǵýshylyq baryn bilgimiz keledi. Belsendi jumys isteýge daiynbyz", - dedi Adani.
Aita keteiik, Adani Group – 1988 jyly Gaýtama Adani negizin qalaǵan úndi kópultty konglomeraty. Kompaniialar toby álemniń 70 elinde bar jáne aktivteriniń jiyntyq quny $100 mlrd-ty quraidy. Konglomerat jumys istegen jyldary álem boiynsha 100 myńnan astam tikelei jáne janama jumys ornyn qurdy.
Eske salaiyq, Gaýtama Adani Astanaǵa 13 jeltoqsanda issaparmen kelgen bolatyn. Sol kúni Prezident Qasym-Jomart Toqaevpen kezdesti.
