QR Bilim jáne ǵylym ministri qashyqtan oqytý men onlain oqytýdy shatystyrýǵa bolmaitynyn aitty. Bul týraly Ortalyq kommýnikatsiialar qyzmetinde ótken mektep oqýshylarynyń IV toqsanda qashyqttan oqý júiesine arnalǵan onlain konferentsiiada aityldy, dep habarlaidy "Ult aqparat".
«Biz qashyqtan oqytý men onlain oqytýdy birdei uǵymda paidalanamyz. Negizinde qashyqtan oqytý onlain oqytýǵa teń emes uǵym. Qashyqtan oqytý – jańaǵy biz aitqan poshta, teledidar, radio, tapsyrmalardy internet arqyly alyp oqý. Osy eki uǵymdy bólek tanýymyz kerek. Mysaly, Bilimland.kz platformasynda búgingi kúni 40 myńnan astam ártúrli resýrs bar. Oǵan tirkelý, paidalaný tolyǵymen tegin. Qashyqtan oqyǵan kezde WhatsApp, elektrondy poshta jáne basqa da messendjerlerdi paidalanýǵa bolady. Qandai resýrs yńǵaily sony tolyǵymen paidalanýǵa bolady. Taǵy bir óte mańyzdy jait, kóbi qashyqtyqtan oqytý degendi onlain oqý dep oilaidy», - deidi QR Bilim jáne ǵylym ministri Ashat Aimaǵambetov.
Onyń aitýynsha, birinshi sáýirde elimizde synaq sabaqtar ótkizilgen.
«Sol kezde tek qana onlain rejimde 1 mln 250 bala shyǵyp, dáris alyp kórdi. Jalpy osy synaq sabaqqa ártúrli platformada elimiz boiynsha 2,5 million bala qatysty. Natijesinde jaqsy daiyndyqty kórdik. Ustazdarymyz qysqa ýaqyt ishinde qashyqtan oqytý júiesine baǵyttalyp, sheberligin shyńdap daiyndalǵan eken. Barlyq ustazdarǵa alǵys aitqym keledi. Synaq sabaqtar kezinde basqasha máselelerdi kórdik. Onlain osynshama qosylýdy kótermeidi, soǵan bailanysty kóp yńǵaisyzdyqtar boldy. Oǵan kózimiz jetip otyr. Tehnikalyq aqaýlar jetkilikti. Internet bul júieni kótere almady. Onlain oqýdyń ornyna men aitqan platformalar arqyly qashyqtan oqytýdy júrgizýimiz qajet», - deidi QR Bilim jáne ǵylym ministri Ashat Aimaǵambetov.
