Jer qoinaýyn paidalanýǵa arnalǵan litsenziialardy elektrondy formatta alý úshin qajetti aqparat ashyq ári qoljetimdi bolýy tiis. Osyndai tapsyrmany Úkimet basshysy Álihan Smaiylov Úkimet otyrysynda berdi, dep habarlaidy QazAqparat.
Onyń aitýynsha, Qazaqstan kóptegen paidaly qazbalardyń qory boiynsha álemde jetekshi oryn alady. Mysaly, hromnyń zerttelgen qory boiynsha álemde birinshi orynda, ýran men volfram boiynsha – ekinshi, myrysh boiynsha – úshinshi, qorǵasyn qory boiynsha – tórtinshi orynda tur. Kómirsýtek shikizatyn óndirýden Qazaqstan 17-orynda.
«Ekonomikamyzdyń óndirýshi sektory jalpy ishki ónimniń 30%-ke jýyǵyn qamtidy.
Soǵan qaramastan, elimizdiń mineraldyq-shikizattyq bazasyn izdeý jáne tolyqtyrý jumystaryn únemi júrgizip otyrý qajet. Sol úshin geologiia bul máselede asa mańyzdy ról atqarady. Geologiiany damytý úshin qatty paidaly qazbalardy izdeýge jeńildetilgen litsenziialaý engizildi. Shaǵyn geologiialyq barlaý kompaniialaryna tiisti jaǵdai jasaldy», - dedi Á. Smaiylov.
Geologiia ǵylymyn damytý jáne óńdeý salasyn shikizatpen qamtamasyz etý maqsatynda Prezident tapsyrmasymen Ulttyq geologiia qyzmeti qurylǵan. «Qazaqstandyqtardyń ál-aýqatyn arttyrýǵa baǵyttalǵan turaqty ekonomikalyq ósý» Ulttyq jobasy aiasynda «Geologiia salasyn damytý» baǵyty qarastyrylǵan. Josparǵa sáikes 2026 jylǵa qarai Qazaqstan jerlerin zertteý jumystary 680 myń sharshy shaqyrymǵa ulǵaiyp, jalpy kórsetkish 2,2 mln sharshy shaqyrymǵa jetedi.
«El aýmaǵyn keńinen zertteý men ákimshilik kedergilerdi joiý óndiris salasyn qarqyndy damytýǵa múmkindik beredi. Nátijesinde Qazaqstannyń investitsiialyq tartymdylyǵy artady. Jalpy, elimizde ǵylymi-institýtsionaldyq baza bar. Iaǵni, geologiia salasyn damytý úshin barlyq jaǵdai jasalýda», - dep atap ótti Premer-Ministr.
Osyǵan orai, Á. Smaiylov geologiia jáne jer qoinaýyn paidalaný salasyndaǵy investorlarǵa geologiialyq málimetterdi qoljetimdi etý úshin aqparattyq júie qurý qajettigin aitty.
«Sondyqtan Ekologiia, geologiia jáne tabiǵi resýrstar ministrligine Tsifrlyq damý, Energetika, Indýstriia ministrlikterimen birlesip, jyl sońyna deiin KAZNEDRA platformasyn ázirleý jáne qoldanysqa engizý boiynsha qajetti sharalardy qabyldaýdy tapsyramyn. Jer qoinaýyn paidalanýǵa arnalǵan litsenziialardy elektrondy formatta alý úshin qajetti aqparat ashyq ári qoljetimdi bolýy tiis», - dedi ol.
Sonymen birge Á. Smaiylov barlaý jáne óndirý quqyǵyn alýǵa múmkindik beretin Memlekettik jer qoinaýy qoryn basqarý baǵdarlamasyn ýaqtyly jańartý qajettigin jetkizdi. Sondyqtan Indýstriia ministrligine Energetika jáne Ekologiia ministrlikterimen birlesip, bir aida jer qoinaýyn paidalanýǵa bolatyn respýblikanyń barlyq aýmaǵyn baǵdarlamaǵa qosýdy tapsyrdy.
«Úshinshi, jer qoinaýyn paidalanýǵa arnalǵan qoldanystaǵy kelisimsharttardy uzartýǵa kóp ýaqyt ketetindikten, ol rásimdi jeńildetý qajet. Indýstriia ministrligine Energetika, Ekologiia, Qarjy, Ulttyq ekonomika ministrlikterimen birlesip, eki apta ishinde ákimshilik kedergilerdi azaitý boiynsha naqty sharalar ázirleýdi tapsyramyn. Atalǵan memlekettik qyzmetti tsifrlandyrý qajet.
Tórtinshi, Ulttyq geologiia qyzmetiniń tolyqqandy jumys isteýin qamtamasyz etý úshin Ekologiia, geologiia jáne tabiǵi resýrstar ministrligine bir ai merzimde tiisti jedel sharalar qabyldaýdy tapsyramyn. Besinshi, ekologtar, depýtattar men qoǵamdyq uiymdar Aqtóbe oblysyndaǵy «Kókjide» biregei jerasty sýlary qorynyń lastanýy máselesin únemi kóterip keledi. Osy oraida Energetika ministrligi atalǵan sý orny aýmaǵynda jer qoinaýyn paidalanýdy shekteý máselesin qarastyrý kerek. Ekologiia ministrligi barlyq jerasty sýlary boiynsha monitoring jumystaryn kúsheitsin», - dep tapsyrma berdi Úkimet basshysy.
