Qazaqstanda halyqty emhanaǵa tirkeý naýqany aiaqtaldy. Biylǵy kampaniiaǵa elimiz boiynsha 607 meditsina uiymy qatysty. Onyń 82-si sharaǵa tuńǵysh ret qatysyp otyr. Bul týraly Almatyda ótken baspasóz máslihatynda «Meditsinalyq saqtandyrý qory» KEAQ basqarýshy direktory Zabira Orazalieva habarlady.
Biyl emhana tańdaý quqyǵyn 300 myńǵa jýyq adam paidalanǵan. Bárinen Shymkent, Almaty, Astana qalalary, Túrkistan, Qaraǵandy jáne Almaty oblystary erekshe belsendilik tanytqan.
«Kampaniia nátijesi bul bastamanyń Astana, Almaty syndy iri qalalar úshin ǵana emes, aimaqtar úshin de mańyzdylyǵyn kórsetip berdi. Bul joly qazaqstandyqtardyń basym bóligi emhanaǵa ózderi baryp tirkelse, 13,5 myńǵa jýyǵy egov.kz portaly arqyly onlain tirkeý qyzmetin tańdaǵan», - dedi Zabira Orazalieva.
Aldaǵy ýaqytta emhananyń tirkeý bólimderi arqyly tirkelý toqtatylady. Bul sheshim júieli problemalardy joiyp, qyzmetin asyra paidalaný jáne falsifikatsiia faktileriniń aldyn alý maqsatynda qabyldanyp otyr.
«Buǵan eshqandai alańdaýdyń qajeti joq. Birinshiden, tirkelý úshin emhanaǵa aiaqtai baryp úirengen azamattar Halyqqa qyzmet kórsetý ortalyqtarynyń qyzmetine júgine alady. Atalǵan ortalyqtarda Connection Point bólimsheleri bar, olar egov portalyna qosylǵan. Sol jerde arnaiy keńesshiler otyrady. Ekinshiden, Egov.kz jýyrda Telegram botyn iske qosty. Smartfonnyń kómegimen osy bot arqyly birer minýtta tirkelýge bolady. Úshinshiden, qazir ózińizdi ǵana emes, balalardy da onlain rejimde tirkeýge múmkindik týdy. Júie barlyq málimetterdi qysqa merzim ishinde, avtomatty túrde shyǵaryp beredi. Bul protsesti barynsha jeńildetedi ári artyq qujat talap etilmeidi», - dedi Z. Orazalieva.
MSQ Almaty filialy direktory Tileýhan Ábildaevtyń aitýynsha, tirkeýge ótinish bergen ońtústik astanalyqtardyń besten biri egov portaly arqyly tirkelgen. Bul jurtshylyqtyń engizilip otyrǵan jańa bastamalarǵa daiyndyq deńgeii joǵary ekenin kórsetse kerek.
Biylǵy tirkeý naýqanyna 607 meditsina uiymy qatysty. Onyń 82-si – kampaniiaǵa tuńǵysh ret qatysyp otyrǵandar. Atalǵan emhanalar keler jyly kepildendirilgen tegin meditsinalyq kómek sheńberinde halyqqa qyzmet kórsetpek.
Jalpy, tirkeý naýqany – emhana aýystyrýdyń jalǵyz joly emes. Qazaqstandyqtardyń jylyna bir ret emhana aýystyrýǵa múmkindigi bar. Sonymen qatar, qonys aýdarǵanda, emhana jabylyp qalsa nemese MSQ-men kelisimshartty buzsa, jaqyn mańnan jańa emhana salynsa, emhana qyzmetine qatysty shyǵyndardy jabatyn erikti meditsinalyq saqtandyrý kelisimshartyn bekitken jaǵdaida basqa emhanaǵa aýysýǵa bolady. Tirkeýmen ainalysatyn emhanalardyń tolyq tizimin Meditsinalyq saqtandyrý qorynyń fms.kz saitynan tabýǵa bolady.
