Foto: Pexels.com
Qazaqstanda orman tálimbaqtaryn qurý, órt sóndirý tehnikasyn jańartý jáne janýarlardy jersindirý siiaqty aýqymdy ekologiialyq sharalar qolǵa alynýda. Ekologiia jáne tabiǵi resýrstar ministrligi osy baǵytta júieli jumystar júrgizip keledi, dep habarlaidy Ult.kz.
Ormandardy qorǵaý jáne tehnikalyq jańartý
Ormandardy qorǵaý men materialdyq-tehnikalyq bazany nyǵaitý maqsatynda órtke qarsy jáne orman órt sóndirý tehnikasyn satyp alýǵa ortalyq biýdjetten 5,4 mlrd teńge bólindi. Sonymen qatar, jergilikti qurylymdar tarapynan 6,7 mlrd teńge qarastyryldy. Osy qarajatqa traktorlar, arnaiy tehnika men órt sóndirý jabdyqtary satyp alynyp jatyr.
Orman órtterin erte anyqtaý júiesi "Qazaqtelekom" kompaniiasymen birlesip engizilýde. Bul júie "Jasyl aimaq" jáne "Semei ormany" siiaqty 24 orman sharýashylyǵy aýmaǵynda synaqtan ótýde.
Jańa orman tálimbaqtary
Alty óńirde jańa orman tálimbaqtary qurylyp jatyr. Jalpy biýdjeti – 21,2 mlrd teńge. Árbir tálimbaqqa 3,5 mlrd teńge qarastyrylǵan, olar jylyna 6 mln kóshet ósirýge qaýqarly bolady. Qurylys 2025 jyly bastalady. Sonymen qatar, bioalýantúrlilikti saqtaý tujyrymdamasy ázirlenýde.
Erekshe qorǵalatyn tabiǵi aýmaqtardy keńeitý
"Merke" óńirlik parki (86 myń ga), "Aral" (471 myń ga) jáne "Jaiyq ormany" (46,9 myń ga) rezervattary qurylýda. Sonymen qatar, Ústirt, Qarataý jáne Ile-Balqash ulttyq parkterin 648 myń gektarǵa keńeitý josparlanýda.
6 erekshe qorǵalatyn tabiǵi aýmaqta baqylaý ótkizý pýnkteri avtomattandyrylyp, elektrondyq tólem júiesi engiziledi. Ormanshylarǵa arnalǵan bilim berý ortalyǵy da ashylady.
Ekologiialyq qozǵalys jáne jasyldandyrý jumystary
2024 jyldan bastap Prezidenttiń "Taza Qazaqstan" bastamasy júzege asyrylýda. Ekologiialyq sharalarǵa 6 mln adam, onyń ishinde 230 myń erikti qatysty. Nátijesinde 1,1 mln tonna qoqys jinalyp, 1,6 mln aǵash otyrǵyzyldy.
2 mlrd túp aǵash otyrǵyzý bastamasy aiasynda 2021 jyldan beri 1,145 mlrd aǵash egildi. Sonymen qatar, Aral teńiziniń qurǵaǵan tabanyn kógaldandyrý maqsatynda 1,1 mln gektarǵa sekseýil otyrǵyzý josparlanǵan.
Qaldyqtardy qaita óńdeý jáne ekojobalar
Qatty turmystyq qaldyqtardy qaita óńdeý baǵytynda 238 mlrd teńgege 94 joba ázirlendi. Bul bastamalar aiasynda zamanaýi poligondar salynyp, qaldyqtardy bólek jinaý júiesi engizilýde.
Sirek kezdesetin janýarlardy jersindirý
Jolbarystardy, qulandardy jáne Prjevalskii jylqylaryn tabiǵatqa qaita jiberý baǵdarlamalary jalǵasýda. Bul sharalar Qazaqstannyń biologiialyq ártúrliligin saqtaý maqsatynda júrgizilýde.
