Bilim jáne ǵylym ministri Ashat Aimaǵambetov ǵylymi kadrlardy daiarlaýdy jetildirý jáne akademiialyq ortany jaqsartý sharalary jaily aitty. Sharalardyń kóp bóligin Bilim jáne ǵylym ministrligi janyndaǵy jas ǵalymdar keńesi usyndy, deidi ministr. Bul týraly ol óziniń Facebook paraǵynda tolyq jazdy.
Aimaǵambetovtyń aitýynsha, dissertatsiiany qorǵaý úshin qajetti basylymdarǵa qoiylatyn talaptardy ózgertý boiynsha QR BǴM buiryǵynyń jobasy daiyndaldy. QR BǴM №127 buiryǵyna sáikes, doktorantqa qorǵaýǵa shyǵý úshin mindetti túrde jeti maqala jariialaý kerek, bul rette sapasy boiynsha erekshe talaptar qoiylmaidy.
"Nátijesinde basty nazar tek sandyq kórsetkishke aýdarylyp, maqalalar sapasy kúmándi jýrnaldarda jariialana bastaidy. Keiin ǵalymdarymyzdyń maqalalary halyqaralyq bazalardan shyǵarylǵan belgisiz bir jýrnaldarda basylyp shyqqanda tań qalyp jatamyz. Álbette, qalyptasqan bul dástúrdi ózgertý kerek. Iaǵni, suranysqa ie emes "álsiz" jýrnaldarda maqalalardyń kóp jariialanýyna qaraǵanda, bedeldi jýrnaldarda sapaly jariialanymdar az shyqqany jaqsyraq dep anyq aitýǵa bolady", - deidi ol.
Buǵan qosa, dissertatsiialyq keńes týraly úlgilik erejege dissertatsiialyq keńes múshelerine qoiylatyn talaptardy arttyrý jónindegi jańa norma engiziledi. Keńes músheleriniń keminde 2/3 bóliginde Hirsh indeksi men retsenziialanatyn halyqaralyq ǵylymi jýrnaldarda keminde úsh jariialanym bolýy tiis. Áleýmettik-gýmanitarlyq baǵyttar úshin bul kórsetkishter tómen bolady.
Sondai-aq, magistrlik jáne doktorlyq dissertatsiialar jetekshilerine qoiylatyn talaptar da ózgeredi.
"Máselen, eger búgingi tańda doktoranttan kúshti jýrnaldarda jariialanym talap etilse, onda ǵylymi jetekshiniń de osyndai jariialanymdary bolýy tiis. Qazirgi ýaqytta is júzinde tiisti talaptar joq", - deidi ministr.
