Energyprom.kz sarapshylarynyń málimetinshe, elimizde benzin úshinshi jyl qatarynan qymbattap jatyr. Mysaly, biyl mamyr aiynyń qorytyndysy boiynsha janarmai 4,7 protsentke, al dizel otynynyń baǵasy birden 41,5 protsentke ósken, dep habarlaidy Sputnik Qazaqstan.
Elde benzin men dizel otynyn óndirý kórsetkishi jyl saiyn ósip keledi. Máselen, 2022 jyldyń qańtar-sáýir ailarynda 1,6 million tonna janarmai shyǵaryldy. Bul 2021 jyldyń sáikes kezeńimen salystyrǵanda 4 protsentke artyq. Sektordaǵy ósim jetinshi jyl qatarynan baiqalyp otyr.
2022 jyldyń qańtar-sáýir ailarynyń qorytyndysy boiynsha 1,7 million tonna dizel otyny óndirilip, óndirý kólemi ekinshi jyl qatarynan ósip otyr. Bul ótken jylmen salystyrǵanda 8,4 protsentke artyq.
"Ishki naryqta munai ónimderi tapshylyǵynyń aldyn alý úshin Qazaqstanda avtokólikpen benzindi, dizel otynyn, sondai-aq basqa da munai ónimderiniń jekelegen túrlerin áketýge tyiym salyndy. Tyiym alty aiǵa sozyldy. Keiin 2022 jyldyń 21 mamyryna deiin uzartyldy. Energetika ministrligi 2022 jyldyń aiaǵyna deiin Qazaqstan aýmaǵynan munai ónimderin shyǵarýǵa tyiym salýdy uzartýdy josparlap otyr", – delingen habarlamada.
Aita keteri, dizel otyny importy bir jylda 15,3 protsentke, biyl birinshi toqsanda 23 myń tonnaǵa deiin qysqarǵan. Eksport birden 6 ese, 17,6 myń tonnaǵa deiin tómendedi. Ishki naryqta 2022 jyldyń qańtar-naýryzynda 1,2 million tonna dizel otyny satyldy. Al bul byltyrǵy jyldyń osy kezeńimen salystyrǵanda 18,3 protsentke artyq.
2022 jylǵy mamyr aiynyń qorytyndysy boiynsha benzin baǵasy ótken jyldyń mamyryna qaraǵanda 4,7 protsentke ósti. Tiisti kezeńdegi ósim osymen úshinshi jyl qatarynan baiqalady. Dizel otynynyń baǵasy birden 41,5 protsentke ósti, al buǵan deiin eki jyl qatarynan arzandaǵan bolatyn.
Janar-jaǵarmaidyń jekelegen túrlerin alatyn bolsaq, bir jylda:
- jazǵy dizel otyny – 24,6 protsentke;
- AI-98 benzini – 9,6 protsentke;
- AI-95/96 – 9,1 protsentke;
- AI-92 – 4, 2 protsentke qymbattaǵan.
Sondai-aq AI-92 markaly benzinniń bólshek saýdadaǵy ortasha baǵasy biyl mamyrda litrine 178 teńge, AI-95/96 – litrine 210 teńge, AI-98 – litrine 232 teńge, al jazǵy dizel otyny litrine 234 teńgeden satylǵan.
AI-92 markaly benzin Petropavlda (litrine 182 teńge), AI-95/96 Almatyda (litrine 215 teńge), Ai-98 Qostanaida (litrine 238 teńge) qymbattady.
Atyraýda benzin baǵasy arzanyraq: AI-92 – litrine 168 teńge, AI-95/96 - litrine 201 teńge, AI-98 – litrine 227 teńge. Aqtaýda AI-95/96 litrine - 201 teńge, Qaraǵandy men Oralda AI-98 litrine – 227 teńge.
Jazǵy dizel otyny Qostanai men Petropavlda qymbatyraq (litrine 260 teńge), al Shymkentte kerisinshe arzan (litrine 225 teńge).
GlobalPetrolPrices.com derekterine súiensek, biyl 6 maýsymda Qazaqstan benzin baǵasy boiynsha 170 eldiń ishinde 11-oryndy ielendi, iaǵni litrine 0,48 dollar. Al dizel otyny boiynsha 169 eldiń ishinde 16-oryndy ielendi: litrine 0,55 dollar.
Eń qymbat baǵa tirkelgen álem elderi qatarynda:
1. Gonkong (litrine 2,96 dollar);
2. Norvegiia (litrine 2,86 dollar);
3. Daniia (litrine 2,73 dollar);
4. Finliandiia (litrine 2,68 dollar);
5. Islandiia (litrine 2,52 dollar SShA).
Dizel otyny eń qymbat elder qatarynda Gonkong (2,73 dollar), Shvetsiia (2,68 dollar), Norvegiia (2,6 dollar), Monako (2,43 dollar) jáne Islandiia (2,46 dollar).
