Ulttyq bank pen Qarjy naryǵyn retteý jáne damytý agenttigi búgin qarjy naryǵy sýbektileriniń jumys rejimin ózgertý týraly birlesken buiryq shyǵardy. Osylaisha «qyzyl», «sary» jáne «jasyl» aimaqtarda qarjy uiymdaryna keletin adam sanyna shekteý qoiyldy, dep habarlaidy "Ult aqparat".
Bul ekinshi deńgeili bankterge, rezident emes bankterdiń filialdaryna, aiyrbastaý pýnktterine, ipotekalyq uiymdarǵa, saqtandyrý uiymdaryna, saqtandyrý brokerlerine, nesielik seriktestikter men lombardtarǵa, tólem uiymdary men kollektorlyq agenttikterge qatysty.
Buiryq Qazaqstan Respýblikasy azamattarynyń ómiri men densaýlyǵyn qorǵaý, sondai-aq koronavirýs infektsiianyń taralýyna jol bermeý maqsatynda qabyldandy.
Buiryqqa sáikes, qyzmetter barynsha onlain rejimde kórsetilýi kerek.
«Qyzyl» aimaqqa» jatatyn óńirlerde kúsheitilgen sanitariialyq-dezinfektsiialyq rejim sharalary qatań saqtalýy tiis.
Sondai-aq qyzmetkerderdiń 60% qashyqtan jumys isteýge aýysady.
«Sary» jáne «jasyl» aimaqtarda – halyqqa qyzmet kórsetken kezde kúsheitilgen sanitariialyq-dezinfektsiialyq rejim sharalaryn qatań saqtaǵan jaǵdaida, óndiristik qajettilik kezinde qashyqtan jumys isteý nysanyna filialdyń shtat sanynyń keminde 30% aýysady.
«Ekinshi deńgeidegi bankter klientter operatsiialaryn óńdeýdi júzege asyratyn qyzmetterdiń jumysyn uiymdastyrýdy jáne bankomattardyń, terminaldardyń, internet-bankingtiń, mobildik bankingtiń jáne basqa da klientterdiń banktik shottaryn qashyqtan basqarý júieleriniń, inkassatorlyq qyzmettiń, call-qyzmettiń, tólem kartalaryn jetkizý qyzmetiniń, sondai-aq olardyń uiǵarýy boiynsha basqa qyzmetterdiń úzdiksiz jumys isteýin qamtamasyz etsin. Sonymen qatar, ekinshi deńgeidegi bankter jáne airyqsha qyzmeti banknottardy, monetalardy jáne qundylyqtardy inkassatsiialaý bolyp tabylatyn zańdy tulǵalar ekonomika sýbektileri men halyqty qolma-qol aqshamen qamtamasyz etý boiynsha úzdiksiz qyzmetti, onyń ishinde bankomattardy qolma-qol aqshamen ýaqtyly tolyqtyrýdy jáne olardyń kidirissiz jumysyn júzege asyrýdy qamtamasyz etýi tiis» delingen buiryqta.
Ulttyq bank pen agenttiktiń birlesken buiryǵy 2021 jyldyń 19 qańtarynda kúshine endi jáne QR bas memlekettik sanitar dárigeriniń qaýlysynda kórsetilgen shekteý sharalary alynǵanǵa deiin kúshinde bolady.
