«Atameken» ulttyq kásipkerler palatasynyń basqarma tóraǵasy Abylai Myrzahmetov agroónerkásiptik keshendi qoldaý sharalaryn aityp berdi, dep habarlaidy QazAqparat.
«Agrarlyq sektordy bankter úshin tartymdy klient dep aita almaimyz. Bul saladaǵy nesieniń 60-70 paiyzy «QazAgro» jelisimen beriledi. Fermerlerdiń biraz bóligi nesie ala almai otyr. Osyǵan bailanysty, Prezident «Qarapaiym zattar ekonomikasy» baǵdarlamasy boiynsha kóktemgi egin jumystaryn júrgizýge 100 mlrd teńge bólýdi tapsyrdy. Munda qaryz alýshylar úshin syiaqy mólsherlemesi 6 paiyzdan aspaidy. «Agrarlyq nesielik koroporatsiia» AQ operator bolyp bekitildi. Biz agroónerkásiptik keshenniń kepildik saiasatyn ózgertýdi usynǵan edik. Endi oǵan oǵan saiasi sheshimder qajet», - dedi A. Myrzahmetov áleýmettik jelide bergen onlain suhbatta.
Onyń aitýynsha, agrarlyq sektordy tsifrlyq platformaǵa aýystyryp, nesieni biznes-josparǵa qarai berý de usynylǵan.
«Ázirge bankter qyzyǵýshylyq tanyta bastady. Kez kelgen jaǵdaidan múmkindikter qarastyrýǵa bolady. Pandemiia oqiǵasy ózin-ózi jumyspen qamtyǵan 4 mln 200 myń adamnyń qai salalarda jumys istep júrgenin anyqtap berdi. Qazir olardyń barlyǵy esepke alynǵan. Olardyń 60 paiyzy nemese 2,6 mln adam - aýyl turǵyndary. Bul turǵyndardy oqytyp, mikronesieler berýge bolady. Munda kepil qajet emes, biliktiligi men biznes-jospary mańyzdy bolmaq. Atalǵan usynystar boiynsha jumys istep jatyrmyz», - dedi spiker.
Sonymen birge, A. Myrzahmetov agrarlyq sektorǵa qandai qoldaý kórsetilip jatqanyn aitty.
«Un men bidai boiynsha kvotalar engizildi. Bul kvotalardy un tartýshylar qaýymdastyǵy taratady. Egistik alqabynan alyp ketý úshin kóptegen oblystarda jedel shtabtar qurylǵan. Qandai da bir qiyndyq týyndasa, sol ortalyqtarǵa júginýge bolady», - dedi Asqar Myrzahmetov.
