Elimizdegi 18 sharýashylyq interańshylyqpen ainalysady. Bul týraly QR AShM Orman sharýashylyǵy jáne janýarlar álemi komitetiniń baspasóz hatshysy Sáken Dildahmet málim etti, dep habarlaidy QazAqparat tilshisi.
«Qazirgi kezde Qazaqstanda jalpy ańshylardyń sany 130 myńǵa jýyq. Olardyń kóbisi ańshylyq uiymdarda tirkelip, kýálikterin alady. Sodan keiin ańshylyq sharýashylyqtarǵa baryp, tiisti kezeńde ańnyń túrine qarai litsenziiany satyp alyp, ańǵa shyǵady. Bul rette olardy sharýashylyqtardaǵy qoryqshylar baqylap júredi», - dedi ol tilshige bergen jaýabynda.
Onyń sózine qaraǵanda, búginde 29 mln gektar aýmaqta 701 ańshylyq sharýashylyq jumys istep tur.
«Sonyń ishinde 18 sharýashylyq interańshylyqpen (ańshylyq týrizm) ainalysady, iaǵni shetel azamattary keledi. Jalpy, atalǵan sharýashylyqtardaǵy kiris orta deńgeide, alaida jyl saiyn ósim baiqalyp keledi», - dedi S. Dildahmet.
Osy oraida ol shetel azamattary elimizdegi taýly óńirlerde ańǵa shyqqandy qalaitynyn atap ótti.
«2017 jyly zańǵa tiisti ózgertýler qarastyrylyp, «fermerlik ańshylyq sharýashylyǵy» túsinigi engizildi. Bul turǵyda sharýashylyqtarǵa fermerlik túrde ańdy ósirip, ańshylyq uiymdastyrýǵa múmkindik beriledi. Osy rette ańdardy ózderi ósirip, múmkindiginshe tabiǵatta júrgen janýarlar sanyn azaitpaýǵa qadam jasaldy», - dedi baspasóz hatshysy.
