Foto: ashyq derekkóz
Qazaqstanda qylmystyq kiristerdi zańdastyrýǵa qarsy kúres aiasynda iri kriptovaliýta arnalarynyń biri joiyldy, dep habarlaidy Ult.kz. Bul týraly Qazaqstan Respýblikasynyń Qarjylyq monitoring agenttigi málimdedi.
Vedomstvo dereginshe, TMD keńistigindegi iri kóleńkeli kriptoservisterdiń biri — «RAKS Exchange» qyzmeti toqtatylǵan. Atalǵan platforma tsifrlyq aktivter arqyly qarajatty qolma-qol aqshaǵa ainaldyrýmen jáne qylmystyq kiristerdi jylystatýmen ainalysqan.
Tergeý barysynda bul kriptoalmastyrǵysh arqyly Qazaqstan, Resei, Ýkraina jáne Moldova aýmaǵynda áreket etken 200-den astam esirtki internet-dúkenderiniń tranzaktsiialary ótkeni anyqtaldy. Platformanyń jalpy ainalymy 224 mln AQSh dollarynan asqan.
Aýqymdy kriptotergeý kezinde Follow the Money tásili qoldanylyp, esirtki ainalymyna jáne darknet alańdarynyń jumysyna qatysy bar 4 myńnan astam kriptoámiianǵa blokchein-taldaý júrgizilgen.
Nátijesinde jalpy somasy 9,7 mln USDT-ten asatyn tsifrlyq aktivter buǵattaldy. Qazirgi tańda onyń 3,2 mln USDT-i tárkilenip, qylmystyq jolmen alynǵany dáleldengen qarajat Agenttiktiń arnaiy shotyna aýdarylǵan.
Agenttik málimetinshe, júrgizilgen operatsiialar nátijesinde azamattardyń densaýlyǵyna qaýip tóndirgen iri esirtki jetkizý arnalary toqtatylyp, taratý infraqurylymy joiylǵan. Sondai-aq birqatar esirtki internet-dúkenderiniń qyzmeti tolyqtai toqtatylǵan.
Qazirgi ýaqytta atalǵan baǵyttaǵy jumystar jalǵasyp jatyr.
