Bas sanitar dáriger Aijan Esmaǵambetova 17 sáýir kúngi brifing kezinde Qazaqstanda barlyǵy 423 meditsina qyzmetkerinen koronavirýs tabylǵanyn habarlady. Olardyń basym bóligi - Almatyda (53%). Degenmen elde dárigerler tapshylyǵy joq dedi Esmaǵambetova. Birneshe saǵat buryn Almaty qalalyq qoǵamdyq densaýlyq basqarmasy qalada 234 meditsina qyzmetkeriniń COVID-19 aýrýyna shaldyqqanyn habarlaǵan bolatyn.
- Dárigerler tapshylyǵyn joiý maqsatynda ár óńirde 10-20 paiyz aralyǵynda rezerv qarastyrylǵan. Sondyqtan qazir meditsina qyzmetkerleri jetkilikti, - dedi Aijan Esmaǵambetova.
Bas sanitar dáriger buǵan qosa 14 sáýirde qabyldanǵan karantindik sharalardy kúsheitý týraly qaýlyǵa silteme jasap, barlyq meditsinalyq mekemelerdiń kúsheitilgen rejimge kóshetinin aitty. Oǵan sáikes, árbir meditsinalyq mekemedegi naýqas "koronavirýs juqtyrǵan adam" retinde qarastyrylady. Dárigerlerdiń barlyǵy qorǵanysh quraldarymen jabdyqtalýy tiis.
Bas sanitar dáriger juma kúngi brifing kezinde Qyzylorda jáne Atyraý oblystarynda ýaqytsha qamaý izoliatorynda eki adamnan koronavirýs tabylǵanyn habarlady.
Buǵan deiin Aqtóbe oblysynda ýaqytsha qamaý izoliatorynda otyrǵan bir turǵynnan virýs anyqtalǵany týraly aqparat shyqqan. Degenmen brifing kezinde Aqtóbedegi jaǵdai aitylmady.
Sońǵy málimet boiynsha, Qazaqstanda 1498 adamnan koronavirýs tabylǵan. 17 adam qaitys bolǵan. 347 naýqas jazylǵan. Aijan Esmaǵambetovanyń aitýynsha, respýblika boiynsha koronavirýs juqtyrǵandardyń kóbeiýi deńgeii 15 paiyzǵa deiin aýytqyp tur. Alaida keibir aimaqta bul kórsetkish 20-60 paiyzǵa jetken. Bas sanitar dáriger sol sebepti aimaqta karantin sharalaryn kúsheitý qajettigin aitty.
Onyń aitýynsha, aldaǵy ýaqytta aimaqtarda qoǵamdyq kólik toqtaidy, jeke kólikterdiń júrýine shekteý qoiylady. Azyq-túlik bazarlary, aiyrbastaý pýnkteri, bankter jabylady.
Qazaqstanda koronavirýsqa bailanysty 16 naýryzda tótenshe jaǵdai jariialanǵan. Buǵan deiin Almaty, Nur-Sultan, Shymkent jáne ózge qalalar men oblystarda karantin jariialanǵan bolatyn.
