Qazaqstanda 19 myńnan astam sheteldik eńbek etip jatyr, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Ministrliktiń málimetinshe, 2020 jylǵy 1 aqpandaǵy jaǵdai boiynsha Qazaqstan aýmaǵynda jergilikti atqarýshy organdardan ruqsat alǵan 19 137 sheteldik azamat eńbek qyzmetin júzege asyrady.
«Olardyń ishinde birinshi sanat boiynsha (basshylar jáne olardyń orynbasarlary) 753 adam (4%), ekinshi sanat boiynsha (qurylymdyq bólimshelerdiń basshylary) – 4 364 (23%), úshinshi sanat boiynsha (mamandar) – 9 613 (50%), tórtinshi sanat boiynsha (bilikti jumysshylar) – 1 749 (9%), maýsymdyq jumystarda – 926 (5%), korporativtik aýystyrý sheńberinde 1 732 adam (9%) tartyldy», delingen habarlamada.
Sheteldikterdi tartqan jumys berýshiniń sany – 2 021, olarda 479 342 qazaqstandyq jumys isteidi, bul qyzmetkerlerdiń jalpy sanynyń 96%.
«Sheteldikterdiń basym bóligi qurylys salasynda – 8 582 adam (45%) jumys isteidi. Taý-ken ónerkásibinde 2 228 adam (12%), óńdeý ónerkásibinde – 1 586 (8%), kásibi, ǵylymi jáne tehnikalyq qyzmette 1 397 sheteldik (7%) jumys isteidi», delingen habarlamada.
Eńbekshi migranttardyń negizgi shyǵý elderi: Qytai – 5 266 adam (28%), Túrkiia – 1 935 (10%), Úndistan – 1 896 (10%), Ulybritaniia – 1 434 (8%), Ózbekstan – 965 (5%).
Eske sala ketsek, ishki eńbek naryǵyn qorǵaý maqsatynda QR Úkimeti jyl saiyn respýblikaǵa sheteldik mamandardy tartý kvotasyn belgileidi. 2020 jylǵa arnalǵan kvota jumys kúshiniń sanyna qatysty 0,32% nemese 29,3 myń birlik mólsherinde bekitildi.
Aita keterligi, elimizde sheteldik jumyskerlerdi tartýǵa arnalǵan kvota 40 paiyzǵa qysqartylǵan.
