.jpg)
QR Premer-Ministri Álihan Smaiylov Mysyrda ótip jatqan Klimattyń ózgerýi jónindegi jahandyq konferentsiianyń (COP27) Álem kóshbasshylary sammitinde sóz sóiledi, dep habarlaidy "Ult aqparat" primeminister.kz saityna silteme jasap.
Klimattyq sammit jumysyna 120-dan astam eldiń ókilderi qatysýda. Memleketter men úkimetter basshylary klimattyń ózgerýiniń eń ózekti máseleleri boiynsha óz elderiniń ustanymdaryn bildiretin «ulttyq úndeýler» jasady.
Álihan Smaiylov óz sózinde Qazaqstan klimat jónindegi Parij kelisiminiń maqsattary men mindetterin berik ustanatynyn atap ótti.
«Bizdiń elimiz 2060 jylǵa qarai kómirtegi beitaraptyǵyna qol jetkizý týraly barynsha biik maqsattardy qoiyp otyr. Osynyń aiasynda jyl sońyna deiin tómen kómirtekti damý strategiiasyn qabyldaý josparlanýda. Ortalyq Aziiadaǵy eldiń alǵash bolyp osyndai mańyzdy qujatty qabyldaýy tarihi sátke ainalmaq», — dedi Álihan Smaiylov.
Onyń aitýynsha, búginde Qazaqstanda jalpy óndiristegi «jasyl» energiianyń úlesi shamamen 3%-dy quraidy. Bul rette ony óndirý kólemin 15%-ǵa deiin, iaǵni 2030 jylǵa qarai qosymsha 7 GVt-qa ulǵaitý josparlanýda. Sonymen qatar biyl kómirtegi shyǵaryndylaryn kem degende 15%-ǵa tómendetý kózdelgen.
«Qazaqstannyń "jasyl" energetikanyń álemdik ortalyqtarynyń biri bolýǵa áleýeti zor. Sondyqtan biz jańartylatyn energiia kózderin damytýdyń aimaqtyq ortalyǵyna ainalýǵa jáne jalpy Ortalyq Aziiany "jasyl" tehnologiialarǵa kóshýge yntalandyrýǵa daiynbyz», — dep atap ótti Premer-Ministr.
Osy oraida ol elimizde «jasyl» sýtegi óndirisi men eksportyn ulǵaitýǵa erekshe nazar aýdarylatynyn aitty.
«Tehnologiialyq jańǵyrtýdyń mańyzdylyǵyn, onyń ishinde Parij kelisimi sheńberinde bilim almasýdy engizý jáne "taza" tehnologiialardy berý qajettigin erekshe atap ótkim keledi», — dedi Álihan Smaiylov.
Budan basqa, QR Úkimeti «jasyl» investitsiialardy yntalandyrý jóninde sharalar qabyldap jatyr jáne «jasyl» qarjynyń biregei óńirlik investitsiialyq ortalyǵy retinde «Astana» halyqaralyq qarjy ortalyǵyn usynýǵa daiyn.
«Sondai-aq biz jańa Ekologiialyq kodeks aiasynda sharalar qabyldap, 2025 jylǵa deiin 2 milliard túp aǵash otyrǵyzý sekildi aýqymdy mindetti iske asyramyz», — dedi Álihan Smaiylov.
Qorytyndylai kele, Premer-Ministr búginde álemdik qoǵamdastyqtyń buryn-sońdy bolmaǵan syn-qaterlerdi bastan keshirip otyrǵanyn atap ótti.
«Osyǵan bailanysty bizge turaqty jáne teń quqyly batyl sheshimder men ádiletti damý úlgileri qajet. Qazaqstan klimattyq kún tártibindegi máselelerdiń keń aýqymy boiynsha barlyq halyqaralyq seriktestermen yntymaqtastyq ornatýǵa daiyn», — dep túiindedi Álihan Smaiylov.
