QR SIM baspasóz qyzmeti
Qazaqstan vizasyz elder tizimin 80 memleketke deiin keńeitti. Bul týraly QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat agenttigi.
«2022 jyly vizasyz elderdiń tizimi pasporttardyń ártúrli sanattary boiynsha 80 memleketke deiin keńeitildi. Onyń ishinde jalpy azamattyq pasporttar úshin - 26 memleket. Pasporttardyń ártúrli sanattary boiynsha 9 jańa elmen ózara kelisimder jasaldy: Maldiv araldary, Andorra, Nikaragýa, Venesýela, Boliviia, Paragvai, Dominikana, Albaniia jáne Beliz», - dedi ol ministrliktiń osy jylǵy jumysyn qorytyndylaýǵa arnalǵan baspasóz máslihatynda.
Munan bólek, onyń aitýynsha, osy jyldyń 12 qazanynda Qatarmen diplomatiialyq jáne arnaiy pasporttardyń ieleri úshin vizalardan ózara bosatý týraly úkimetaralyq kelisimge ózgerister engizý týraly hattamaǵa qol qoiyldy. Ol jalpy azamattyq pasporttardyń ielerin vizalyq talaptardan bosatady.
«Qolaily investitsiialyq ahýaldy qurý, iskerlik bailanystardy jandandyrý jáne eldiń týristik áleýetin arttyrý úshin QR Úkimeti Iran Islam Respýblikasynyń, Qytai Halyq Respýblikasynyń jáne Úndistan Respýblikasynyń azamattary úshin vizasyz rejim engizdi. Bul osy elderdiń azamattaryna Qazaqstan aýmaǵynda 14 kúnge deiin bolýǵa múmkindik beredi», - dedi Aibek Smadiiarov.
