"Qazaqstan temir joly" (QTJ) ulttyq temirjol tasymaldaýshysy Áliia Nazarbaevanyń temirjol biletterin satýmen ainalysatyn Instant Payments kompaniiasymen kelisimshartyn buzdy. Bul týraly "Ult aqparat" Stan.kz aqparat agenttigine silteme jasap habarlaidy.
QTJ basqarma tóraǵasynyń orynbasary Ánýar Ahmetjanovtyń aitýynsha, 1 jeltoqsannan bastap Instant Payments kompaniiasymen kelisimshart buzylǵan.
"1 jeltoqsannan bastap "Instant Payments" kompaniiasymen kelisim-shart buzyldy, qazir "Mobildi portal" JShS jumys isteidi. Kompaniia konkýrstyq negizde tańdaldy. Olar biletterdi elektrondy satý boiynsha qyzmet kórsetedi. Biz olarǵa ár satylǵan bilet úshin 29 teńge tóleimiz. Bul jeke kompaniia, iesiniń kim ekenin tekserip kóre alasyzdar. Biraq ol kompaniialyq basshylyǵynda tanymal adamdar joq, eger siz osyny meńzep tursańyz", – dedi Ahmetjanov.
Sonymen qatar Ahmetjanov biletterdi satyp alý tártibi ózgerissiz qalǵanyn atap ótti.
"Biz biletterdi satylymǵa shyǵaramyz, bul kompaniia biletterdi agentter arqyly onlain nemese kassa arqyly satýdy uiymdastyrady. Qazir biletterdi ústemeaqysyz QTJ kassalarynan nemese bizdiń sait arqyly satyp alýǵa bolady", – dedi Ánýar Ahmetjanov.
Eske salsaq, buǵan deiin "Qazaqstan temir joly" ulttyq kompaniiasynyń basqarma tóraǵasy Nurlan Saýranbaev ailyq jalaqysy qansha ekenin aitqany týraly jazǵan edik.
