Foto: kursiv.media
2019 jyly jóndeýge jabylǵan Astanadaǵy “Qazaqstan” sport saraiy áli kúnge deiin qoldanysqa berilmedi. Bir jyldan keiin keshendi jóndep, keiin paidalanýǵa berý úshin sheteldik investor tartylatyn edi. Al 2021 jyly Astana ákimi sport kesheni apattyq jaǵdaida turǵanyn, tipti súrilýi múmkin ekenin málimdedi. Odan keiin ǵimarat slovakiialyq ColosseoEAS kompaniiasyna jóndýge beriledi. Biraq tiisti jumystar júrgizilmegen. Byltyr qala ákimi jańa investor izdep jatqanyn habarlady, dep jazady «Ult aqparat» MNU Newsroom -ge silteme jasap.
2000 jyly salyna bastaǵan “Qazaqstan” sport saraiy bir jyldan keiin paidalanýǵa berildi. Jalpy aýdany 22000 m², 4 qabatty ǵimarat ishinde 8 jolǵa arnalǵan 50 metrlik bassein, 5000 kórermen syiatyn hokkei muz alańy jáne basqa da jattyǵý zaldary bar.
Odan bólek, keshen ishinde 80 oryndy qonaq úi, meiramhana men kafe jumys isteidi. “Qazaqstan” kesheniniń basty ereksheligi – muz alańy men basseinniń bir shatyrdyń astyna birigýi.
Astanalyq “Barys” hokkei klýby Kontinentaldy hokkei ligasynda eldegi oiyndaryn osy sport saraiynda ótkizip keldi. Klýb talabymen keshen alǵash ret 2007 jyly jóndeýden ótti.
2019 jyldyń sáýirinde kúrdeli jóndeý jumystary qajet dep tanylyp, keshen jumysy toqtatyldy. Astana qalasy ákimdigi baqylaýyndaǵy “Astana” áleýmettik-kásipkerlik korporatsiiasy ǵimaratqa tekserý júrgizip, kúrdeli jóndeý júrgizý alǵyshartyn anyqtady.
Zertteý nátijesinde dánekerlengen jáne boltty qosylystardyń fizikalyq tozýy korroziialyq deformatsiiaǵa ushyraǵan. Sondai-aq, sapasyz qurylys materialdaryna bailanysty qasbettiń keramikalyq plitalary da jaramsyz. Qasbettiń tehnikalyq jaǵdaiy qanaǵattanarlyqtai emes jáne shekteýli jumys isteitin qurylys retinde baǵalanady.
2021 jyldyń aqpan aiynda Astana qalasynyń sol kezdegi ákimi Altai Kólginov ǵimarattyń apatty jaǵdaida turǵanyn, soǵan bailanysty kúrdeli jóndeý jasalatynyn, tipti ǵimaratty tolyǵymen buzýǵa týra kelýi múmkin ekenin aitqan edi.
Sol jyly ákimdik sport keshenin jańǵyrtý úshin slovakiialyq SolosseoEAS kompaniiasymen memlekettik-jekemenshik áriptestik týraly shartqa qol qoiady. Shartqa sáikes, aldymen apattyq qurylymdardy bólshekteý, sodan keiin nysandy jańartý josparlandy. Jumys 2022 jyldyń basynda bastalyp, 2024-ke qarai bitýi kerek bolǵan edi.
Informburo.kz saitynyń dereginshe, SolosseoEAS kompaniiasy jobalyq qujattamaǵa memlekettik saraptamany kesh alady. Ákimdik ókiliniń málimdeýinshe, oǵan kompaniia qyzmetkerleriniń qujattardy retteýdi keshiktirgeni negiz bolǵan. Sonyń esebinen jobany iske asyrý quny 16,8 mlrd teńgeden 24,8 mlrd teńgege, iaǵni 8 milliardqa ózgeredi. Slovak kompaniiasy bul sommany qazaqstandyq bankten kreditke almaq bolǵan. Biraq, qorytyndynyń keshigýi sebebinen banktan kredit alý múmkindigi júzege aspaǵan.
Astana qalasynyń ákimi Jeńis Qasymbek ótken jyldyń qyrkúiek aiynda sport saraiyn jóndeý jumystarynyń júrmeý sebebin túsindirip, sport nysanynyń qashan ashylatynyn aitty.
“Sport kesheni apattyq jaǵdaida bolǵan soń eki jyl buryn nysandy jańǵyrtý jumysy bastalǵan. Ókinishke qarai, investor qurylys jumysyn tolyq júrgize almady. Jumys bir orynda toqtap turdy. Degenmen bir kezderi tanymal bolǵan nysannyń osyndai kúide turýyna biz jol bermeimiz”, – dep jazdy ákim óziniń Instagram paraqshasynda.
Elorda ákimi sport ortalyǵy 2024 jyly, iaǵni biyl ashylatyn aitqan. Dese de, biyl naýryz aiynda Tengrinews.kz portalynyń jazýynsha, Astana qalasynyń dene shynyqtyrý jáne sport basqarmasy sport keshenin jańǵyrtý aiaqtalatynyn, biraq biýdjettik-investitsiialyq jobalar aiasynda iske asatynyn málimdegen. Barlyq jóndeý jumystary 2026-2027 jyldary aiaqtalady dep boljanǵan.
Cport saraiynyń qurylysyna qatysty Astana ákimdigine hat joldady. Biraq ázirge jaýap kelmedi.
