Qarasha aiynda Kókshetaý qalasynda Qazaqstan-Resei XVII aimaqaralyq yntymaqtastyq forýmy ótpeitin boldy. Bul týraly QR Prezidentiniń baspasóz hatshysy Berik Ýáli málim etti, dep habarlaidy "Ult aqparat".
«Epidemiologiialyq jaǵdaidyń qiyndai túsýine bailanysty Qazaqstan men Reseidiń XVII aimaqaralyq yntymaqtastyq forýmynyń ótetin ýaqyty keiinge shegerildi. Buǵan deiin Forým biylǵy qarasha aiynyń ekinshi jartysynda eki el basshylarynyń qatysýymen Kókshetaý qalasynda ótedi dep josparlanǵan bolatyn», - dep jazdy Berik Ýáli Facebook-te.
Eske salaiyq, Qazaqstan men Resei arasyndaǵy XVI óńiraralyq yntymaqtastyq forýmy byltyr qarasha aiynda Reseidiń Omby qalasynda ótken bolatyn.
Qazaqstan Prezidenti Qasym-Jomart Toqaev kezekti XVII forýmdy 2020 jyly Kókshetaý qalasynda ótkizýdi usynǵan edi.
Aita keteiik, kórshiles eki el arasyndaǵy Óńiraralyq yntymaqtastyq forýmy 2003 jyldan beri turaqty uiymdastyrylyp keledi.
