EKSPO-2017 halyqaralyq kórmesindegi Qazaqstan pavilony 90 paiyzǵa daiyn. Bul týraly búgin QR Úkimetindegi baspasóz máslihatynda elimizdiń Energetika ministri Qanat Bozymbaev, dep habarlaidy Ult.kz tilshisi QazAqparat agenttigine silteme jasap.
«Qazirdiń ózinde Qazaqstan pavilony 90 paiyzǵa daiyn. Ózderińiz de biletindei, ónertapqyshtardyń týyndylaryn tóreshiler tańdap aldy. Osy ýaqytta balama energetika salalaryna, jalpy aitqanda «jasyl ekonomikaǵa» qatysy bar 28 týyndy irikteldi. Onyń 11-i maket retinde, al qalǵany video rolik retinde kórsetiletin bolady. Maketter qazirgi ýaqytta Sankt-Peterbýrgte jasalyp jatyr. Meniń orynbasarym ótken aptada baryp keldi, jumys tiisti deńgeide júrgizilýde. Video rolikter de jasalýda. Shamamen 1-2 aptanyń ishinde tolyǵymen daiyn bolady», - dedi Bozymbaev.
Sonymen qatar ol jalpy Qazaqstan pavilonyna biýdjetten qansha aqsha jumsalǵanyn qazirgi ýaqytta aita almaityndyǵyn atap ótti.
«Aldymen jumysty bitireiik. Odan keiin ashyq túrde aitatyn bolamyz», - dedi ministr.
Aita keteiik, EKSPO-2017 halyqaralyq mamandandyrylǵan kórmesi 10 maýsymda bastalyp, 10 qyrkúiekke deiin sozylady. Kórmege 2 millionnan astam adam keledi dep kútilýde. Olar kórmeni keminde eki ret aralaidy dep josparlanǵan. Jalpy kórmeni tamashalaýshylardyń 85 paiyzyn Qazaqstan azamattary, al qalǵan 15 paiyzyn sheteldikter quraidy. Sheteldikterdiń basym bóligi TMD elderiniń jáne Qytaidyń azamattary bolady dep kútilýde. Qazirgi ýaqytta 112 memleket pen 18 halyqaralyq uiym EKSPO kórmesine qatysatyndyǵyn resmi túrde rastady.
