Foto: Aqorda
Qasym-Jomart Toqaev pen Rejep Taiip Erdoǵan Qazaqstan – Túrkiia Joǵary deńgeidegi strategiialyq yntymaqtastyq keńesiniń altynshy otyrysyn ótkizdi, dep habarlaidy Ult.kz.
Kezdesý barysynda taraptar ekijaqty qarym-qatynasty damytý, saýda-ekonomikalyq jáne mádeni-gýmanitarlyq bailanystardy nyǵaitý máselelerin talqylady.
Ótken jyldyń qorytyndysy boiynsha taýar ainalymy 8,8 paiyzǵa ósip, 5,4 milliard dollardan asqan.
Qasym-Jomart Toqaev saýda-sattyqty ári qarai jandandyrýǵa qolaily jaǵdai jasap, alys-beristi ártaraptandyrýdyń mańyzyna toqtaldy.
Prezidenttiń aitýynsha, Qazaqstan Túrkiiaǵa qazirdiń ózinde 34 taýar túri boiynsha eksport kólemin ulǵaita alady. Onyń jalpy quny – 630 million dollardan asady.
Bul rette Memleket basshysy eki eldiń qarjy ortalyqtary men tsifrlyq saýda platformalary arasyndaǵy seriktestiktiń, sondai-aq búgin Astanada ótip jatqan Qazaq-túrik biznes-forýmynyń nátijesi saýda-ekonomikalyq bailanystardy odan ári tereńdete túsetinine senim bildirdi.
Keńeste aýyl sharýashylyǵy salasyndaǵy yqpaldastyqqa airyqsha mán berildi.
Byltyr eki eldiń agroónerkásip keshenindegi taýar ainalymy 25 paiyzdan asyp, 360 million dollarǵa jýyqtaǵan.
Birqatar investitsiialyq joba iske asyp jatyr. Qasym-Jomart Toqaev Tiryaki Agro qolǵa alǵan gliýten men krahmal óndirisin, Alarko Holding salyp jatqan jylyjai keshenin mysalǵa keltirdi.
Túrkiia tarapyna Aýyl sharýashylyǵy ónimderiniń ózara saýdasyn jandandyrý jóninde 2026-2028 jyldarǵa arnalǵan jol kartasyn qabyldaý usynyldy.
Jiynda qazirgi geosaiasi jaǵdaida kólik-logistika salasynyń strategiialyq mańyzy arta túskenine nazar aýdaryldy.
Memleket basshysy bul rette Transkaspii halyqaralyq kólik dálizine ózge elderdiń qyzyǵýshylyǵy artyp kele jatqanyna toqtalyp, túrik kompaniialaryn Quryq, Aqtaý porttary arqyly júk tasymalyn ulǵaitýdy kózdeitin jobalarǵa belsendi atsalysýǵa shaqyrdy.
Qazaqstan aviatsiia salasyndaǵy yntymaqtastyqqa da airyqsha mán berip otyr. Sondyqtan Almaty halyqaralyq áýejaiyn Ortalyq Aziiadaǵy logistikalyq hab retinde damytýdy kózdep otyrǵan TAV Airports Holding kompaniiasynyń bastamalaryna jan-jaqty qoldaý kórsetiledi.
Bul rette Memleket basshysy elimizde investitsiialyq ahýaldy jaqsartý úshin atqarylyp jatqan aýqymdy jumystar, investorlarǵa arnalǵan jeńildikter jóninde málimet berdi.
Sonymen qatar Túrkiia biznesmenderin shikizattyq emes jobalardy birlese iske asyrýǵa úndedi.
Jiynda energetika, taý-ken, tsifrlandyrý jáne jasandy intellekt, qorǵanys ónerkásibindegi ózara tiimdi seriktestik aiasyn odan ári keńeitý perspektivasy qarastyryldy.
Rejep Taiip Erdoǵan respýblikalyq referendýmda halyq qoldaýyna ie bolǵan jańa Konstitýtsiia Qazaqstannyń yntymaǵyn arttyra beretinine senim bildirdi.
Sonymen qatar Túrkiia Prezidenti eki el arasyndaǵy qarym-qatynas keńeitilgen strategiialyq áriptestik aiasynda barlyq salada nyǵaiyp kele jatqanyn aitty.
– Qadirli baýyrymmen ótkizgen kezdesýde saýdadan bastap energetika, qorǵanys ónerkásibi, kólik-logistika salalaryndaǵy yntymaqtastyq, sondai-aq jahandaǵy ózekti máseleler sekildi kóptegen taqyrypta pikir almastyq. Biz saýda ainalymyn 15 milliard dollarǵa jetkizýge nietti ekenimizdi rastadyq. Osy oraida 15 sáýirde Astanada ótken Úkimetaralyq ekonomikalyq komissiianyń 14-shi otyrysynda qabyldanǵan 67 tarmaqtan turatyn Is-qimyl josparyn júzege asyrýdyń mańyzyna toqtaldyq. Investitsiia salasynda kompaniialarymyzdy yntalandyrýdy jalǵastyramyz. Búgingi biznes-forým siiaqty iskerlik ortany biriktiretin is-sharalar eki eldiń saýda-ekonomikalyq bailanystaryn nyǵaitý turǵysynan asa mańyzdy dep sanaimyn, – dedi Túrkiia Prezidenti.
Keńes otyrysynda Qazaqstan tarapynan Premer-Ministrdiń orynbasary – Ulttyq ekonomika ministri Serik Jumanǵarin, «Samuryq-Qazyna» aktsionerlik qoǵamynyń basqarma tóraǵasy Nurlan Jaqypov, Túrkiia tarapynan Syrtqy ister ministri Hakan Fidan, Saýda ministri Bolat Omer baiandama jasady.
