Qazaqstan men Túrkiia kásipkerleri 472,6 mln dollarǵa memorandýmdar men kelisimder bekitti, dep habarlaidy QazAqparat tilshisi.
Qazaqstan-túrik biznes forýmynyń qorytyndysy boiynsha taraptar agroónerkásiptik keshen, densaýlyq saqtaý, mashina jasaý, metallýrgiia, jeńil ónerkásip, logistika jáne týrizm salasyndaǵy jobalardy iske asyrý boiynsha 10 qujatqa qol qoidy.
Olardyń arasynda Almaty qalasynda ekinshi farmatsevtika zaýytyn salý týraly kelisim, Nur-Sultan qalasynda Meditsinalyq jáne indýstriialyq respiratorlar shyǵaratyn zaýyt týraly kelisim, Almaty qalasyndaǵy avtojoldarǵa arnalǵan metall bolat konstrýktsiialaryn óndirý zaýyty kelisimi jáne Nur-Sultan qalasynda saýda, oiyn-saýyq ortalyǵyn salý týraly kelisim bar.
«Túrkiia men Qazaqstan – bekem bailanystary bar baýyrlas eki halyq, sonymen qatar dini jáne tildik qundylyqtarymyz da bar. Eki el arasyndaǵy dostyq bailanystar barlyq jaǵynan damyp keledi. Búgingi kásipkerlerimiz bekitetin kelisimder ekonomikalyq yntymaqtastyǵymyzdyń mehanizmderin odan ári nyǵaitatynyna senemiz. Qańtar oqiǵalary kezinde de osy yntymaq-birligimizdiń irgesi sógilmeitinin kórdik. Árdaiym bir-birimizge qoldaý kórsetip, ortaq jobalar jalǵasa beredi dep oilaimyz», - dedi Túrkiia Respýblikasynyń vitse-prezidenti F. Oktai «Rixos President Astana» qonaq úiinde ótken Qazaqstan-Túrkiia biznes-forýmynda.
Óz sózinde Fýat Oktai Túrkiia álemdegi úlken ekonomikalardyń biri ekenin atap ótti.
«Pandemiia kezinde Túrkiia memlekettik salada, jeke salada da ekonomikasyn ári qarai jalǵastyra berdi. Bizdiń ekonomikamyz 11 paiyzǵa damyp, sońǵy 10 jyldaǵy eń joǵary kórsetkishke jetti. Bizdiń eksporttyq úlesimiz de jaqsy damyp keledi. Túrkiianyń eksporty sońǵy 21 jyl ishinde alǵashqy rekordtyq deńgeige jetti. Bul aldyńǵy jylǵa qaraǵanda 56 mlrd dollarǵa artyp, 225 mlrd dollarǵa jetti. Syrtqy saýdada da kórsetkishter 2021 jyly shamamen 500 mlrd dollarǵa jetti. Qazaqstanda kórshiles eldermen salystyrǵanda myqty naryq ortalyǵy bolýǵa áleýeti bar. Osy múmkindikti jaqsy paidalaný kerek», - dedi Túrkiia Respýblikasynyń vitse-prezidenti.
Onyń aitýynsha, Qazaqstanda túrik firmalary daiyn kiimnen dári indýstriiasyna deiin túrli jobalardy júzege asyryp keledi.
«Túrik merdigerleri Qazaqstanda 27 mlrd dollar deńgeiinde 508 jobada óz qoltańbasyn qaldyrǵan. Kaspii teńizinde 750 mln dollarlyq joba bar, 650 mln dollarlyq Ekspo ǵimaratynyń jobasy, odan basqa «Aqtoǵai Mys» kesheni sekildi úlken jobarlarda merdigerlik jasady. Oǵan qosa 11 ai sekildi qysqa ǵana ýaqytta aiaqtalǵan Túrkistan halyqaralyq áýejaiy bar. Bular da tolyqtai túrik investitsiiasy arqyly júzege asty. Qańtar oqiǵalarynan keiin de Qazaqstandaǵy túrik firmalarynyń yntymaqtastyǵy senimdi túrde jalǵasyp jatyr. Osy máselede investorlar men investitsiialardy qorǵaýǵa Q. Toqaev bergen kepildemeleri de úlken mańyzǵa ie. Sondyqtan Qazaqstanǵa túrik kásipkerleri atynan alǵysymdy bildirgim keledi», - dedi F. Oktai.
