Qazaqstan men Túrkiia Qorǵanys ministrlikteri áskeri tarif jáne málimetter almasý salalarynda eki hattama daiyndap jatyr. Bul týraly QR Qorǵanys ministri Nurlan Ermekbaev aitty, dep habarlaidy QazAqparat.
«Búgin Túrkiia Qorǵanys ministri Hýlýsi Akar qorǵanys vedomstvosynyń basshysy retinde Qazaqstanǵa alǵash ret resmi saparmen kelip otyr. Ózderińiz biletindei, Túrkiia bizdiń strategiialyq áriptesimiz sanalady. Bizdiń strategiialyq áriptestiktiń berik negizin eń aldymen eki memleket basshylarynyń óte jaqyn, senimdi ári dostyq qarym-qatynasy qalap otyr. 2018 jylǵy qyrkúiekte QR Tuńǵysh Prezidenti – Elbasy Nursultan Nazarbaevtyń Túrkiiaǵa resmi sapary barysynda mańyzdy qujattarǵa qol qoiyldy. Ol - áskeri yntymaqtastyq jónindegi kelisim jáne qupiia málimetterdi saqtaý jónindegi kelisim. Al endi quqyqtyq bazany nyǵaitý baǵytynda áskeri tarif jáne málimetter almasý salalarynda taǵy eki hattama daiyndalyp jatyr», - dedi Nurlan Ermekbaev túrik áriptesimen kezdesýden keiingi brifingte.
QR Qorǵanys ministri, túrik áriptesimen júzdesý barysyna eki eldiń arasyndaǵy yntymaqtastyqtyń basym baǵyttary aiqyndalǵanyn aitty.
«Onyń ishinde eń aldymen birlesken oqý-jattyǵý, birlesken áskeri jáne jaýyngerlik daiarlyq, ekinshiden, áskeri bilim berý máselesi bar. Atap aitqanda, Túrkiia bizge tapshy mamandyqtar boiynsha áskeri qyzmetshilerdi, mamandardy daiyndaidy. Onyń ishinde gidrografiia, áskeri teńiz salasynda jáne kiberqaýipsizdik salasynda óte mańyzdy joǵary deńgeidegi mamandardy daiyndap beredi. Biz óz tarapymyzdan byltyr alǵash ret Ulttyq qorǵanys ýniversitetimizde bir top túrik áskeri qyzmetshini daiyndadyq. Mundai ózara tiimdi, paidaly yntymaqtastyqty damytatyn bolamyz. Odan basqa kelesi jylǵy jalpy josparlardy da talqyladyq jáne áskeri tehnikalyq saladaǵy basty basymdyqtar men baǵyttar boiynsha ózara pikir almastyq. Al naqty kelissóz bizdiń Indýstriia jáne infraqurylymdyq damý ministrligimen júrgiziledi», - dedi ol.
«Biz eki eldiń arasynda qorǵanys salasyndaǵy yntymaqtastyqty odan ary keńeitýge qatysty máselelerdi talqyladyq. Prezidentter deńgeiinde elderimizdiń arasynda tyǵyz dialog pen yntymaqtastyq ornaǵandyqtan jumysymyz barynsha jeńil boldy. Biz qol jetkizilgen ýaǵdalastyqtarǵa qatysty máselelerdi talqyladyq», - dedi Hýlýsi Akar.
