Búgin Qazaqstan-Ózbekstan shekarasyndaǵy «Jibek Joly» ótkizý pýnkti mańynda Qazaqstan Premer-Ministri Asqar Mamin men Ózbekstan Premer-Ministri Abdýlla Aripov kelissóz júrgizip, «Ortalyq Aziia» Halyqaralyq saýda-ekonomikalyq yntymaqtastyq ortalyǵynyń (HSEYO) qurylysy júrgiziletin jerge kapsýla salý rásimine qatysty. Bul týraly primeminister.kz saity habarlady.
Taraptar Qazaqstannyń Ózbekstanmen saýda-ekonomikalyq, investitsiialyq, aýyl sharýashylyǵy, tranzittik-kólik, týristik, ǵarysh salalaryndaǵy, ónerkásiptik kooperatsiiadaǵy, transshekaralyq sý resýrstaryn utymdy paidalaný men qorǵaýdaǵy, sondai-aq aimaqaralyq jáne shekara mańy yntymaqtastyǵyndaǵy ózekti máselelerdi talqylady. Avtomobil jasaýda, AÓK ónimderin qaita óńdeýde, sondai-aq joǵary jyldamdyqty «Túrkistan-Shymkent-Tashkent» temirjol magistralyn salýda birlesken jobalardy iske asyrý máselelerine erekshe nazar aýdaryldy. Kelissóz qorytyndysy boiynsha A. Mamin men A. Aripov «Ortalyq Aziia» HSEYO qyzmetin uiymdastyrý jónindegi is-sharalar josparyna, sondai-aq temirjol kóligin damytý jónindegi birlesken is-qimyl týraly hattamaǵa qol qoidy.
«Ortalyq Aziia» HSEYO «Jibek Joly» (QR) jáne «Gisht Kýprik» (ÓR) ótkizý pýnkti aýdanynda ornalasatyn bolady. Ortalyqtyń jalpy aýmaǵy – 400 ga, ótkizý múmkindigi 35 myń adamdy jáne eki baǵytta táýligine 5 myń júk kóligin quraidy. Ortalyq Qazaqstan men Ózbekstannyń birlesken investitsiialyq jobalaryn iske asyrý úshin iri ónerkásiptik jáne saýda-logistikalyq alańǵa ainalýǵa arnalǵan. Ónerkásiptik kooperatsiianyń neǵurlym perspektivaly baǵyttary óńdeý sektory, AÓK jáne jeńil ónerkásip bolyp otyr.
«Qazaqstan men Ózbekstan úkimetteri ózara saýda-sattyq deńgeiin 10 mlrd dollarǵa deiin jetkizý mindeti boiynsha jumys isteýde. Búgin iske qosylatyn joba osy maqsatqa qol jetkizýge qyzmet etedi jáne eki memlekettiń jan-jaqty strategiialyq yntymaqtastyǵyn odan ári nyǵaitýǵa yqpal etetin bolady», — dedi A. Mamin.
Qazaqstan tarapy Ózbekstannyń Sýhandariia jáne Ferǵana oblystarynda úsh kóterme-taratý ortalyǵyn ashý arqyly QR men ÓR arasynda biryńǵai taýar ótkizý júiesin qurýǵa qyzyǵýshylyq bildirdi, onyń jalpy investitsiia kólemi 22,5 mln dollar jáne aýystyryp tieý qýaty jylyna 67 myń tonnany quraityn bolady.
Jumys sapary aiasynda QR Premer-Ministri Qazaqstan-Ózbekstan shekarasyndaǵy jańǵyrtylǵan «B. Qonysbaev» ótkizý pýnktine bardy. 2019 jylǵy shildeden 2020 jylǵy jeltoqsan aralyǵynda júrgizilgen rekonstrýktsiiadan keiin onyń qurylys alańy 2 ese 6 ga deiin, qozǵalys jolaqtarynyń sany 2-den 6-ǵa deiin, pasporttyq baqylaý kabinalarynyń sany 6-dan 16-ǵa deiin ulǵaidy, zamanaýi inspektsiialyq-tekserip qaraý keshenderi ornatyldy. Qabyldanǵan sharalardyń nátijesinde pýnkttiń ótkizý múmkindigi eki baǵytta táýligine 150-den 1 myń avtomobilge deiin, 6 eseden astamǵa ósti, ótý ýaqyty 60 minýttan 25 minýtqa deiin 2 esege qysqardy.
