Osy aidyń ishinde Qazaqstan men Qyrǵyzstan bir-birine sý berý kestesin saqtamaý sebepterin talqylaidy. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Qyrǵyzstanmen transshekaralyq ózender salasyndaǵy yntymaqtastyq Shý jáne Talas ózenderi boiynsha júzege asyrylady. Sý resýrstaryn bólý 1983 jylǵy erejelermen retteledi. Sondai-aq 2000 jyldan bastap Shý jáne Talas ózenderinde memleketaralyq paidalanýdaǵy sý sharýashylyǵy qurylystaryn paidalaný týraly úkimetaralyq kelisim qoldanylady», - dedi ol Senat Tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Onyń aitýynsha, Qazaqstan osy kelisim boiynsha óz mindettemelerin tolyq kólemde oryndaidy. Sonymen qatar qyrǵyz tarapy da Qazaqstanǵa negizinen Shý ózeniniń basseininde ornalasqan memleketaralyq arnalar arqyly sý berý kestesin merzimdi túrde saqtamaidy.
«Bizdiń óńir qazir sýy az tabiǵi kezeńge tap boldy. Óz kezeginde, sý berý kestesin saqtamaýdyń barlyq sebepteri aldaǵy qarasha aiynyń sońynda ótetin komissiia otyrysynda talqylanady. Qazirgi ýaqytta sý berý kestesiniń buzylýyna jol bermeý maqsatynda kelesi jyldarǵa naqty sharalar qabyldanýda. Qazaqstan tarapy Kirov sý qoimasyndaǵy (Qyrǵyzstan) jóndeý jumystaryn aiaqtady. Bul sý qoimasyn jinaqtaý rejimine ótkizýge múmkindik berdi. Óz kezeginde osy jait kelesi vegetatsiialyq kezeńge qajetti sý kólemin jinaý úshin úlken septigin tigizedi», - dedi Maǵzum Myrzaǵaliev.
