Qytaidyń Hainan aralyndaǵy qazaqstandyq týrister mingen alǵashqy reis Almatyǵa keldi. Sputnik Qazaqstan tilshileri olardy áýejaida qarsy aldy. Jolaýshylardyń barlyǵy derlik betperde kigen.
Áýejaiǵa kireberiste eki jedel járdem kóligi turdy. Alaida týrister bortta infektsiia juqtyrǵan adam bolmaǵanyn málimdedi. Kelgennen keiin olardy teplovizor arqyly teksergen.
"Ushaqta tipti eshkim túshkirmedi. Bizdi baspasózdiń habarlamasy shoshytty. Záremiz ushty, eshteńe jegen joqpyz (ekzotikalyq). Betperde men kózildirik kiip júrdik. Ol jaqta 20 qańtardan beri boldyq", - deidi Haikoýdan (Hainan aralyndaǵy qalalyq okrýg) kelgen qazaqstandyq Arnai.
Ol sonymen qatar Sputnik Qazaqstan tilshilerine Haikoýdan ushyp shyqqan kezde túsirgen videosyn kórsetti. Videorolikten qalanyń qańyrap qalǵanyn kórýge bolady. Kóshede adam men kólik múldem joq.
Karantin jariialanýyna bailanysty barlyq adam úide otyr, dep atap ótti óz aty-jónin aitqysy kelmegen taǵy bir jolaýshy. Soǵan qaramastan, oǵan demalys unapty.
Basqa jolaýshy Áliianyń aitýynsha, ol Hainanda balalarmen – qyzymen, jienimen birge demalǵan. Joldamalardy koronavirýs týraly jańalyq shyqqanǵa deiin satyp alypty. Indet taralyp jatqanyn Qytaiǵa barǵan kezde bir-aq bilgen.
"Balalar úshin múldem alańdaǵan joqpyn. Onda bári tynysh boldy. Demalystyń shyrqyn eshteńe buzbady. Tek, sońǵy eki kún, 26 qańtardan bastap ekskýrsiialar men oiyn-saýyq is-sharalaryn toqtatty", - deidi ol.
Qazaqstandyq týrister mingen SCAT ushaǵy 29 qańtarda Haikoýdan ushyp keldi. Ushaq 28 qańtarda saǵat 14:25-te ushýy tiis bolǵan, biraq reis keiinge qaldyryldy. Kelý ýaqyty úsh ret aýystyryldy.
"Onda eshqandai dúrbeleń joq. Bári baqylaýda. Biz jaqsy demaldyq. 27 qańtardan bastap ol jaqqa ushaq ushpai jatyr, týristerdi araldan shyǵarýda. Biraq biz erterek qaita almadyq", - deidi olardyń kópshiligi.
