Qytaidyń Ýhan qalasynda jańa koronavirýstyq infektsiia paida boldy. Bul týraly QR Bas memlekettik sanitarlyq dárigeri Jandarbek Bekshin aitty, dep habarlaidy QazAqparat.
«Dúniejúzilik densaýlyq saqtaý uiymynyń resmi aqparaty boiynsha, jańa koronavirýstyq infektsiianyń 41 jaǵdaiy tirkelgen. Onyń ishinde 7 adam aýyr jaǵdaida bolyp, 2-ýi qaitys bolǵan. Bizdiń ulttyq úilestirýshiler DDSU-men bailanys jasap otyr. Ýhan qalasynyń mýnitsipaldyq basqarma saitynda jańa koronavirýsty infektsiianyń 198 jaǵdaiy tirkelgeni, onyń ishinde 25 naýqas emdelip, 3-eýi qaitys bolǵany týraly jazylǵan», - deidi Jandarbek Bekshin.
Sondai-aq, ol Tailand, Japoniia, Qytaidyń Hýbei provintsiiasynda osyndai jaǵdai bireýden tirkelgenin aitty.
«Gonkongta da jańa koronavirýsqa kúdikti alty jaǵdai tirkeldi, biraq rastalǵan joq. Biz bul máselege úlken kóńil bólip jatyrmyz. Shekaradan ótý oryndarynda baqylaýdy kúsheittik. Halyqaralyq áýejailarda qashyqtyq termometriia jasap jatyrmyz. Qazirgi tańda 13 myńnan astam jolaýshy qashyqtyq termometriiadan ótti. Onyń ishinde ekipaj músheleri de bar», - deidi ol.
Qytaidyń bes qalasyna Nur-Sultan jáne Almaty qalasynan reister bar.
«Almatyǵa arnaiy temirjolmen keletin jolaýshylar da baqylaýǵa alyndy. Bortserikter men jolseriktermen jumys istep, trening ótkizip jatyrmyz, sebebi qandaida bir jaǵdai bolsa bizge habarlaityn solar», - deidi Jandarbek Bekshin.
