Búgin Májilistiń jalpy otyrysynda depýtat Jambyl Ahmetbekov Premer-Ministr Asqar Maminniń atyna resmi saýal joldap, aýyl turǵyndaryn mazalap otyrǵan aýyz sý máselesin kóterdi, dep habarlaidy "Ult aqparat".
«QR Parlamentiniń Májilisine Aqmola oblysynyń Qorǵaljyn aýdany, Qyzylsai aýyldyq okrýgynyń Shalqar aýylynan «Aqsaqaldar alqasy» jáne aýyl turǵyndary atynan 51 adam qol qoiǵan ujymdyq hat-úndeý kelip tústi. Halyqtyń suraýy bireý ǵana - ol aýyz sý. Aýyz sý – ol aýamen qatar adam ómiri úshin eń qajetti másele ekendigine eshkim talaspaidy jáne osy mańyzdy másele úshin «Aqbulaq» memlekettik baǵdarlamasy aiasynda milliardtaǵan qarajat bólindi. Ókinishke orai, memleket aýyz sýmen qamtamasyz etý úshin qanshama milliard aqsha-qarajat bólse de halyqty aýyz sýmen qamtamasyz etýge áli kúnge deiin tolyq qol jetkize almai kelemiz», - dedi depýtat.
Onyń dereginshe, Qorǵaljyn-Shalqar baǵytyndaǵy 1970 jyly salynǵan uzyndyǵy 29,5 shaqyrym sý qubyry magistralynyń 2014 jyly 95 paiyzǵa tozǵandyǵy rastaldy. Osyǵan bailanysty 2015 jyldan bastap aýyz sý aýylǵa avtokólikpen tasymaldanyp jetkiziledi. Shalqar aýylynyń ishki sý tartý qubyry 2010 jyly salynyp, 2014 jylǵa deiin qoldanysta boldy. Búgingi kúni qaraýsyz qalǵandyqtan jaǵdaiy nashar kúide.
«Kúzdiń jaýyn-shashyny kezinde, qystyń boranynda jol jabylǵan kezderde aýyl turǵyndaryn aýyz sýmen qamtamasyz etýde kóptegen qiyndyqtar týyndaidy. Byltyr qańtardyń qarly borany kezinde avtomobil joly jarty aiǵa jýyq jabylyp, Qorǵaljyn eli qar eritip, muz oiyp ishýge májbúr boldy. Bul jaǵdai respýblikalyq Qazaqstan-1 telearnasynan kórsetildi. Osy jaǵdai áli sol kúiinde, ókinishtisi bul úirenshikti jaǵdaiǵa ainalyp barady. Jaǵdai óte kúrdeli, bizdegi naqtylanbaǵan derekter boiynsha Qorǵaljyn, Birtaban, Shalqar aýyldarynda 6 myńnan astam adam turady. Osy aýyldarda 5 myńǵa tarta iri-qara mal, 3 myń jylqy, 6 myń qoi-eshki, 15 myńǵa tarta úi qustary ósiriledi. Máseleniń áleýmettik mańyzdylyǵyn eskere otyryp, respýblikalyq biýdjetten atalǵan eldi mekendi aýyz sýmen qamtamasyz etý úshin qajetti qarajatty bólý múmkindigin qaraýyńyzdy suraimyz», - dedi Jambyl Ahmetbekov.
